கூற்றுவன் கீழே விழுமாறு அவனை உதைத்த வீரக்கழலணிந்த திருவடிகள் இரண்டும் என்தலைமேல் இருத்தலைப் பெற்றேன் . ஆதலின் மிகச் சிறப்பாகக் காட்சிவழங்குகின்ற அழகிய நெய்த்தானத் திருப்பதியின் குளிர்ந்த பொழில்களிடையே அமைந்த கோயிலில் விரும்பி உறைகின்ற நீலகண்டனே ! தற்போதம் அற்று நின்போதத்தால் தியானிக்கும் வகையில் உன்னைத் தியானிக்கின்றேன் .

காலனை வீழச் செற்ற கழலடி :- காலின் கீழ்க் காலன்றன்னைக் கடுகத்தான் பாய்ந்து ` காற்றனார் காலற் காய்ந்து `. ( தி .4 ப .36 பா .6,8) காலனைச் செற்ற கழலடி யிரண்டும் என் மேலனவாகியிருக்கப் பெற்றேன் மேதகத் தோன்றுகின்ற . ( தி .4 ப .35 பா .9) கோலம் - அழகு , குளிர் பொழிற் கோயில் - குளிர்ந்த சோலைக்குள் இருக்கும் திருக்கோயில் . மேய - மேவிய ; விரும்பி எழுந்தருளிய . நீலம் வைத்த அனைய கண்ட - நீல நிறத்தை வைத்தாற்போன்ற நஞ்சுண்டு உட்புகாது நிறுத்திக் காட்டுஞ் சீகண்டனே . நினைக்குமா - தற்போதம் அற்று நின் போதத் தால் நினைக்குமாறு .

மன்மதனை ஒரு காலத்தில் நெற்றிக்கண்ணால் நெருப்பாகப் பார்த்து அழித்து , நறும்புகையும் தீபமும் காட்டித் தொழும் அடியவர்களுக்கு அருள்கள்செய்து , எல்லா உயிர்களுக்கும் பாதுகாவலைத் தரும் சோலைகளால் சூழப்பட்ட நெய்த்தானம் என்னும் இருப்பிடத்தில் பொருந்தியுள்ள சிவபெருமானைத் தியானிக்கும் அடியேனுடைய மனம் நல்வாழ்வுக்கு உரிய செய்தியைத் தியானித்த செயல் போற்றத்தக்கது .

காமனை - மன்மதனை . அன்று சிவபிரான் யோகிருந்த காலத்தில் , கண்ணுதல் நெற்றி (த்தீ)க் கண்ணால் , கனல் எரி - கனலும் எரி , தூமம் - புகை , தீபம் - திருவிளக்கு , காட்டி :- தூப தீபங்களை , பூசிக்கப் பெறும் பரமேசுவர சந்நிதியிற் சிவாகம விதிப்படி அசைத்துக் காணச்செய்து . தொழுமவர் :- வழிபடும் அடியார் . சேமம் - காவல் . வாமன் - சிவபிரான் .

பிறைதங்கிய சடையின்மேலே கங்கைதங்குமாறு வைத்த எங்கள் மேம்பட்ட தலைவனாய் , பல ஊழிகளின் வடிவினனாய் , பலசோலைகளாலும் சூழப்பட்ட நெய்த்தானமாகிய அவன் உகந்தருளும் திருப்பதியைக் குறையிரந்து வேண்டிக் கொள்ளும் திருவடித்தொண்டர்களுக்கு இளையவனாகிய எம்பெருமான் அடைவதற்கு எளியவனாய் உள்ளான் .

பிற - பிறை ; பிறத்தலுடையது . பிறைதருசடை - பிறையைத் தரப்பெற்ற சடை . பிறை இடப்பொருள் ( தானி ). சடை இடம் ( தானம் ). உறைதரல் - தங்குதல் . உறு - உறை . நிறு - நிறை . குறு - குறை . என முதனிலை ஐஉறல் உணர்க . குறைதரும் அடியவர் - குறையிரந்து வேண்டிக்கொள்ளும் திருவடித் தொண்டர் . ` நாளும் மிகும் பணிசெய்து குறைந்தடையும் நன்னாளில் ` ( தி .12 பெரிய . அப்பர் 45) ` இல்வாழ்வு பெறத்தரு சூலையினுக்கு எதிர்செய் குறை என் கொல் எனத்தொழுதார் ` ( தி .12 பெரிய . அப்பர் 73) என்புழிப்படும் நன்றியுமாம் . சிவ . போ . மாபாடியம் . சூ . 12 வெண்பா (` தன்னை அறிவித்து `) உரையில் உள்ளதுணர்க .

சிள்வீடு என்ற வண்டுகள் ஒலிக்கும் சோலைகள் சூழ நிலைபெற்ற நெய்த்தானத்தில் விரும்பி உறைந்து திருவடிகளில் அணிந்த கழல்கள் ஒலிக்குமாறு கூத்து நிகழ்த்தும் எம் மேம்பட்ட தலைவர் காய்ச்சி வடிக்கப்பட்டுக் கூரிதாக்கப்பட்ட மழுவைக் கையிலேந்தி , நீண்ட சடையிலே பிறையை அணிந்து திருநீறு அணிந்த மார்பிலே பல நூல்களை முறுக்கி அமைக்கப்பட்ட பூணூலை அணிந்தவராவார் .

வடிதரு மழு - வடித்துக் கூரியதாக்கிய மழுப்படை . வார் ( சடை ) - வார்ந்த சடை ; நீள் சடையுமாம் . பொடி தருமேனி - பவளம்போல் மேனியிற் பால்வெண்ணீறு `. புரிதரு நூலார் - ஒன்பான் கொண்ட மூன்றுபுரி நுண்ஞாண் ` அணிந்தவர் . நெடி - சிள்வண்டு , பொழில்களின் அடை , அடிதரு கழல் - திருவடியிற் பூட்டிய வீரக் கழல் , ஆர்ப்ப - ஒலிக்க . அண்ணலார் - சிவனார்க்கு இடுகுறிப் பெயர் .` ஆடல் மேவிய அண்ணலார் ` ( தி .12 பெரிய . ஏயர்கோன் 98)

கையில் ஒளிவீசும் நெருப்பை ஏந்திச் சுடுகாட்டை இடமாகக் கொண்டு பாடுகின்ற பூதங்கள் தம்மைச் சூழப் பண்ணோடு பல பாடல்கள் பாடி ஆடிய திருவடிகளை உடையவராய்ச் சிறப்புமிக்க அழகிய குளிர்ந்த நெய்த்தானத்தில் எப்பொழுதும் உறைகின்ற இளையவராகிய எம்பெருமானை அடையும் திறத்தை அறியாது இருக்கின்றேனே !

காடு இடம் ஆக நின்று ஆடிய கழலர் . கனல் எரி ஏந்தி ஆடிய ; பாடிய பூதம் சூழ ஆடிய ; பண்ணுடன் பலவும் சொல்லி ஆடிய ; சீரார் - சீருடையார் . சீர் ஆர் நெய்த்தானம் எனலும் பொருந்தும் . அம் - அழகு , தண் - குளிர்ச்சி , என்றும் கூடிய - எப்பொழுதும் வீற்றிருந்தருளும் . குழகனார் - அழகனார் , இளமையர் . ` குழகராய் இள மடந்தையர்க்கு உருகுவோர் ` ( பாரத . சூதுபோர் . 66 ) என்றலாற் காளையர் என்னும் பொருட்டுமாம் . கூடும் ஆறு - சிவயோக நெறி .

தேவர்கள் நாடோறும் வணங்கித்துதித்து மலர்களை அருச்சிக்க , அவர்களுக்கு வேண்டியவற்றை வழங்கும் நன்மை செய்பவனாய் , சிவந்த கண்களையுடைய திருமாலாகிய காளையை உடையவனாய் , வண்டுகள் விரும்பித் தங்குகின்ற சோலைகள் நாற் புறமும் சூழ விளங்கும் நெய்த்தானத்தில் விரும்பி உறைகின்ற , வளைந்த பிறை சூடியபெருமானைக் கூடும் திறத்தை அறியாது உள்ளேனே !

வானவர் - விண்ணோர் பேரின்ப வீட்டினர் . வைகலும் - நாள்தோறும் . வைகுறு :- விடியற்பொழுதில் வழிபடல் வேண்டு மென்பது குறித்து நின்றது , வழிபாட்டிற்குரிய சிறந்த பொழுது அதுவே யாகும் . சிவாகம விதியிற்காண்க . மலர்கள் தூவி வழிபட்டவர்க்குச் சங்கரன் செய்வன எல்லையுட்படாதன ஆதலின் ` அருள்கள் ` என்று பன்மையிற் கூறலாயிற்று . தான் - சங்கரனைக் குறித்து நின்ற படர்க்கை யொருமைப் பெயர் . அசையுமாம் ` தான் அலாது உலகம் இல்லை ` ( தி .4 ப .40 பா .1) ` தாம் ஆர்க்கும் குடியல்லாத் தன்மையான சங்கரன் ` ( தி .6 ப .98) ` தங்கோல நறுங்கொன்றைத் தார் அருளாது ஒழிவானோ ` ( தி .4 ப .12 பா .6) என்னும் இடத்தில் ` தான் ` ` தன் ` இரண்டும் எதுகை நோக்கிய திரிபாதல் உணர்க . சங்கரன் - நலன் நல்குவான் . ` செங்கண் ஏற்றன் ` ` செங்கண் மால்விடை ` யினன் . தேன் அமர் - தேன் பொருந்திய ; வண்டுகள் விரும்புகின்ற . கூன் இளமதியம் . வளைந்த பிறை .

திருமாலைத் தம் திருமேனியின் ஒருபாகமாகக் கொண்டு மகிழ்ந்த நெய்த்தானப் பெருமானார் காலிலே அசைகின்ற கழல்கள் ஒலியெழுப்ப , ஒளிவீசுகின்ற தீயினைக் கையில் வைத்து வீசிக்கொண்டு தரையில் பள்ளம் தோன்றவும் , விரிந்த சடை வானத்தை அளாவ எட்டுத் திசைகளிலும் பரவவும் கூத்து நிகழ்த்தும் மேம் பட்டவராவார் .

கால் அது :- அது சுட்டுப் பெயர் அன்று . முதனிலைப் பொருளே தனக்கும் உரியதாக நிற்பது . ஞாலம் - மண்ணுலகம் . ஈண்டு ஆடநின்ற நிலம் குறித்தது . குழிய - குழியடைய , பள்ளமுற . நட்டம் - திருக்கூத்து . இது தமிழ்ப் பெயர் , வடசொற் சிதைவு அன்று . கொட்டம் ( கொள் + து + அம் ) வட்டம் ( வள் + து + அம் ) போல்வது . மேலவர் - விண்ணவர் மால் ஒரு பாகம் :- ` இடமால் தழுவிய பாகம் ` ( தி .4 ப .2 பா .4). ` மாலுங்கொப்பளித்த பாகர் ` ( தி .4 ப .24 பா .7) ` மறிகடல் வண்ணன் பாகா ` ( தி .4 ப .62 பா .8) ` பாகம் மாலுடையர் போலும் ` ( தி .4 ப .66 பா .8). ` திருமாலோர் பாகன் ` ( தி .4 ப .77 பா .5) அரியலாற்றேவி யில்லை ஐயன் ஐயாறனார்க்கே `.

முடிக்கப்பட்ட சடையின்மேலே கங்கையைச் சூடி மாலை நேரத்தில் தீயில் கூத்தாடும் பெருமானார் திருவையாற்றை அடைந்தவராய்த் தம்மைக் கும்பிடுபவராய் வணங்கி வழிநின்று வாழ்த்துபவராகிய அடியவர்களின் நாவில் நின்று , தியானம் செய்பவர் மனத்தில் உறைந்து , சிறந்த நெய்த்தானத்தில் நிலையாகத் தங்கி விட்டார் .

பந்தித்த - கட்டிய . புனலது :- ` காலது ` ( தி .4 ப .37 பா .7) என்பதற்கு உரைத்ததுணர்க . அந்திப்போது - மாலைவேளை . அனலும் - தீயிலும் . அடிகள் - கடவுள் . வந்திப்பார் - வந்தனை புரிபவர் ( வாயின் உள்ளார் ). வணங்கி நின்று வாழ்த்துவாருடைய வாயின் உள்ளார் . சிந்திப்பாருடைய சிந்தையினுள்ளார் . சிந்தித்தல் நினைப்பு . வாழ்த்துதல் உரையொலி . வந்தித்தல் மெய்த்தொழில் என முப் பொறிக்கும் உரியன உணர்த்தப்பட்டன , மூன்றும் ஒருவழிப் படாதது வழிபாடன்று . ( சிவஞான சித்தியார் சூ . 1 ). ` திருந்து ` என்பது நெய்த் தானத்திற்கு அடை நெய்த்தானனார்க்கு அன்று . திருந்திய இடம் .

ஆதியும் அந்தமும் ஆகியவராய் , எல்லோரும் விரும்பித் துதிக்க , நீதியாகவும் தவம் முதலிய வகுக்கப்பட்ட நெறிகளாகவும் , நிலைபெற்றிருக்கும் திருநெய்த்தானப் பெருமான் ஒளியாகவும் , அவ்வொளியை வெளிப்படுத்தும் சூரியன் முதலிய சுடர்ப் பொருள்களாகவும் ஆயினவராய் , திருநீற்றைச் சந்தனமாகப் பூசி வேதம் ஓதி , நன்மக்கள் தம்மைத் துதித்தலால் தாம் அவர்களுக்கு அருள் செய்பவராவார் .

சோதி - ஒளி . சுடர் - முச்சுடர் , முச்சுடர்க்கண்ணும் நின்று ஒளிரும் முதற் பொருளே சோதி , அச்சோதிக்கும் இடம் முச்சுடர் . ` அருக்கனாவான் அரனுரு ` ( தி .5. ஈற்றுத் திருப்பதிகம் 8). ` நிலம் நீர் நெருப்புயிர் நீள்விசும்பு . நிலாப் பகலோன் புலனாய மைந்தனோடு எண்வகையாய்ப் புணர்ந்து நின்றான் ` ( தி .8 திருவாசகம் ). என்பனவற்றால் , சுடருளும் புணர்ந்து நின்றவன் முதல்வன் . புணரும் இடம் சுடர் எனல் இனிது விளங்கும் . ` சுண்ணவெண் சாந்து ` ` சுண்ணவெண் சந்தனச்சாந்தும் ` ( தி .4 ப .2 பா .1) ` சுண்ண வெண்பொடி ` ( தி .5 ப .10 பா .9). ` சுண்ணத்தர் சுடு நீறுகந்தாடலர் ` ( தி .5 ப .87 பா .7). உலகம் - உயர்ந்தோர் , உலகம் வாய் ஓதி ஏத்த என்றும் தாம் உகந்து அருள்கள் செய்தார் என்றும் கொள்க . ஓதி - ஓதத்தை யுடையது ; கடல் . வாய் - இடம் ; ஓதிவாயுலகம் - கடலிடைப்பட்ட உலகம் எனலும் ஆம் . ஆதியும் ( முதலும் ) அந்தமும் ( முடிவும் ) ஆனார் . யாவரும் - எச் சமயத்தவரும் . நீதி - நன்னெறி ; நியாயம் ; முறைமை . நியமம் - நிச்சயம் . தவம் முதலிய பத்துமாம் . ( சைவ வினாவிடை 29 ) ` நீதியானை நியம நெறிகளை ஓதியானை ` ( தி .5 ப .94 பா .6) என்றதால் இது விளங்கும் .

இலைவடிவமாக அமைந்த வேலினைக் கையில் ஏந்திய இராவணனைத் தலை உட்பட உடல் முழுதையும் நசுக்கிப் பின் மீண்டும் அவனுக்குப் பல அருள்களைக் கொடுத்து , வில்லிலே அம்பினை இணைத்து மும்மதில்களையும் அழியுமாறு வெகுண்ட , என்றும் அழியாத நிலையை உடைய பெருமான் நிலைபெற்ற திருநெய்த்தானத் திருப்பதியை உகந்திருப்பவராவார் .

இலையுடைப்படை :- ` ஒளிறு இலை எஃகு ` - ` விளங்கிய இலையையுடைய வேல் `. ( புறம் . 26 ) ` திருந்திலை நெடுவேல் ` - ` திருந்தின இலையையுடைய நெடியவேல் ` ( புறம் . 180 ) ` நச்சிலைவேல் ` - ` நஞ்சு தோய்த்த அலகையுடைய வேல் ` ( சிந்தாமணி . 2209 ). அவற்கு - அ ( வ் விலங்கையர் தலை ) வனுக்கு . தான் ( அருள்கள் ) செய்து . சிலை - மேருவில் . கணை - மால்கணை . நிலை - அழியாத நிலைமை .