விசயமங்கையுள் வீற்றிருக்கும் வேதியனாகிய பெருமான் , தம் அங்கையில் தருப்பையும் , மலர்களும் கொண்ட அழகிய , குற்றமற்ற மங்கலவாசகம் உரைப்போர் வாழ்த்தும்படி பொருந்த உமையும் தானும் ஒரு திருமேனி உருவில் நின்றான் .

குசை - தருப்பை . கோசம் - புத்தகம் ; இறைவனது முழு முதல் தன்மைகூறும் பதிகங்களில் ஒன்று . வசையில் - குற்றமற்ற . மங்கல வாசகர் - மங்களவாசகமாகிய வேதவாழ்த்துக் கூறும் அந்தணர் . மணிவாசகரைக் குறித்ததாகக் கூறுவாரும் உளர் . இசைய - தம் திருமேனியோடு பொருந்த . ஒன்றாயினான் - ஓருருவமாயினான் ; மாதொரு கூறனாயினான் என்றபடி . விசையமங்கையுள் - திருவிசயமங்கை என்னும் தலத்துள் . வேதியன் - வேதங்களை அருளிச் செய்தவன் .

ஆதிக்கண் தோன்றியநாதனும் , வலியுடைய இடபத்தின்மேல் அமரும் பூதநாதனும் , புலித்தோலாடையனும் , வேதநாதனும் ஆகிய பெருமான் விசயமங்கையில் உள்ளான் ; அவன் திருவடிகளைப் புகழ்ந்து உரைக்க வல்லார்க்குப் பாவம் இல்லை .

ஆதிநாதன் - எல்லா உலகிற்கும் ஆதியாய் முளைத்த தலைவன் . அடல் - வலிமை . விடை - இடபம் . பூத நாதன் - பூதகணங்களின் தலைவன் . புலியதள் - புலித்தோல் . வேதநாதன் - வேதங்களால் புகழப்படும் தலைவன் அல்லது வேதங்களின் தலைவன் .

கொள்ளிடக்கரைக் கோவந்தபுத்தூரில் வெள்ளிய இடபம் பூசிக்க அதற்கு அருள்செய்தவனும் , விசயமங்கையுள் இடமாகக்கொண்டு உறைகின்றவனும் ஆகிய உருத்திரன் , கிள்ளிய விடத்துப் பிரமனுக்குத் தலை ஒன்று அற்றது .

கொள்ளிடக்கரை - கொள்ளிடநதியின் கரையின் கண்ணே உள்ள . கோவந்தபுத்தூரில் - கோவந்தபுத்தூர் என்னும் தலத்தில் . வெள்விடைக்கு அருள்செய் - வெண்மையான இடபத்திற்கு அருள் செய்த . உருத்திரன் - துன்பத்தை ஓட்டுகின்றவன் . அயனுக்குக் கிள்ளிடத் தலையற்றது - பிரமன் தலைகள் ஐந்தனுள் ஒன்றினைக் கிள்ளிட அவ்வயன் ஒரு தலையற்றவனானான் .

விசயமங்கையில் உள்ள மிகப் பழையவனாகிய பெருமான் , திசைகள் எங்கும் குலுங்குமாறு திரிபுரங்கள் அசையும்படிப் பொருந்திய அழலூட்டியவன் ; அப்பெருமான் திருவடிப்புறத்து விரைந்து மயங்கி விழுந்தனன் கூற்றுவன் .

திசையும் - எட்டுத் திசைகளும் . எங்கும் - எல்லா உலகங்களும் . குலுங்க - நடுங்க . அசைய அங்கு எய்திட்டுத் திரிபுரங்கள் ஆடி அசையும்படி அவை இருக்கும் இடம் சென்று அடைந்து . ஆர்அழல் - அணைப்பதற்கு அரிய நெருப்பை . விருத்தன் - மிக முதியன் . முன்னைப் பழம்பொருட்கு முன்னைப் பழம் பொருளானவனாதலின் விருத்தன் என்றார் . புறத்தடி - புறக்காலால் . விசையின் - விரைவாக . மங்கி - ஒளி மங்கி .

ஓட்டைகளை உடைய உடம்பினகத்து ஐம்பூதங்கள் கள்ளத்தனம் உடையவாக்கிக் கலக்கிய கரிய இருளிலே , அவ்விருளை விலக்குதல் புரிந்த விசயமங்கைப்பெருமான் தன் திருவுள்ளத்தே நினைந்தருளலை நோக்கி என் உள்ளத்துள்ளே உறைவான் .

பொள்ளல் - பொத்தல் . ஒன்பது ஓட்டைகளை உடைய வீடாதலின் உடலைப் பொள்ளல் ஆக்கை என்றார் . உள்ளல் - தன்னை நினையும்படிச் செய்து . அகத்தில் - உள்ளே . கள்ளமாக்கி - வஞ்சகத்தை மனத்தே உளதாக்கி . கலக்கிய - மனத்தை அலைத்த . கார் இருள் - மிக்க இருளை உடைய அறியாமையை . விள்ளலாக்கி - நீங்கும்படி செய்து , உள்ளல் நோக்கி - நான் தியானம் செய்வதைப் பார்த்துக்கொண்டே . உள்ளுள் - உள்ளத்திற்குள்ளே . உறையும் - எழுந்தருளியிருக்கும் .

முல்லைநிலத்துக்குரிய இடபக்கொடியையும் , மேருமலையாகிய வில்லையும் பொருந்த உடையவனாகிய விசய மங்கையின் அருட்செல்வ ! போற்றி ! என்று உரைப்பார்க்குத் தென் திசையில் ஏறுதலும் , இனிய புகழும் உளதாகும் .

கொல்லை - முல்லைநிலக்காடு . ஏறு - மாலாகிய இடப ஏறு . ஏற்றுக்கொடி - இடபக் கொடி . பொன்மலை - மேருமலை . வில்லை ஏற்றுடையான் - மேரு மலையாகிய வில்லை ஏற்றுக்கொண்டவன் . தென்றிசை எல்லையேற்றலும் - தெற்கில் உளதாய எமனுலக எல்லையில் காலன்வந்து வரவேற்று இன்சொல் கூறுதலுமாம் என்பதாம் . வணங்கிவர வேற்பான்என்க . இன்சொலும் - இன் சொல் கேட்கும் தகுதிப்பாட்டையும் . ஆகும் - கொடுப்பதாகும் . எமனால் வழிபடப்படுவர் என்றபடி .

கண்ணும் பல்லும் சிந்திவிட்டகபாலத்தைத் தம் அழகியகைக்கொண்டு உண்ணுகின்ற பலிக்கு எங்கும் திரிகின்ற உத்தமனும் , வெண்பிறையைக் கண்ணியாக உடையானுமாகிய விசயமங்கையின் நண்புக்குரிய கடவுளைத் தொழப்பெற்றது நன்மையேயாகும் .

கண்பல் உக்க - கண்களும் பற்களும் உதிர்ந்த . கபாலம் - மண்டையோடு . அங்கைக் கொண்டு - அழகிய திருக்கரத்தே கொண்டு . உண்பலிக்கு உழல் - உண்ணும் பிச்சைக்கு வருந்தித் திரிகின்ற . உள்ளொளி - தன்னுள்ளே ஒளியையுடைய . கண்ணி - தலை மாலை . நண்பன் - தோழனாயிருப்பவன் .

பாண்டுவின் மகனாகிய பார்த்தன் ( அருச்சுனன் ) பணிகள் செய்து தான் விரும்பிய நல்வரத்தைக் கொண்ட விசய மங்கையில் உறையும் ஆண்டவன் திருவடியே நினைந்து ஆசையால் அவனைக் காணுதலே கருத்தாக இருப்பன் அடியேன் .

பாண்டுவின் மகன் - பாண்டு என்னும் குருகுலத் தரசனுடைய மகன் . பார்த்தன் - அர்ச்சுனன் . பணி செய்து - தொண்டு செய்து . வேண்டும் - விரும்பும் . தலவரலாறு கூறியபடி .

மயக்கந் தீர்தற்குரிய மனிதர்களே ! அடியேன் கூறுவதை வந்து கேட்பீராக ; வெந்த திருநீற்றை அணிந்தவனாகிய விசயமங்கைப் பெருமான் தன்னைச் சிந்தையால் நினைவார்களைச் சிக்கெனத் தன் உறவுடையவராக்கி உய்யக் கொள்வான் ; காண்பீராக .

கேண்மின் - கேளுங்கள் . மயல் தீர் - அறியாமை நீங்கிய . சிக்கென - உறுதியாக . பந்து - உறவினன் .

இலங்கைக்கரசனாகிய இராவணனது இருபது தோள்களும் இற்று விழும்படியாகத் திருக்கயிலையை ஊன்றிய திருவிரலை உடையவனாகிய பெருமானுக்குரிய விசய மங்கையை வலம் வந்து வணங்குபவர்களும் , வாழ்த்து இசைப்பவர்களும் நன்னெறிநாடித் தமக்கு நலம் செய்வாராவர் .

விலங்கல் - மலை . கயிலைமலையிடத்தே ஊன்றிய திரு விரலை உடைவன் என்பார் விலங்கல்சேர் விரலான் என்றார் . நலஞ் செய்வார் - தம்முயிர்க்கு நன்மை செய்தவராவர் . நாடி - அடைந்து .