அறிவில்லாத நெஞ்சமே ! யான் கூற நீ கேட்பாயாக . உடம்பாகிய இடத்தின் உட்புறத்தில் , ஐம்பொறிகள் பரு உடம்பாய் நின்று , விரும்பிய இன்றியமையாத பொருள்களைத் தந்து நிரப்பி , வினைகளுக்குத் தங்கும் இடமாகிய இந்த உடம்பில் இருந்து , ஐம்புல நுகர்ச்சி நுகர்ந்து கொண்டே தப்பித்துப் போகலாம் என்ற எண்ணத்தை விட்டுவிடு . நீண்ட கருங்கண்ணியாகிய பார்வதி பாகனாய்க் கப்பல்கள் இயங்கும் கடலில் தோன்றிய நஞ்சினை உண்டு நிறுத்திய நீலகண்டன் விரும்பி உறையும் திருநெய்த்தானத் திருக் கோயிலைத் துதித்துத் தியானிக்க வேண்டும் என்பதனை விருப்புற்று நினைத்து நீ செயற்பட்டால் பிறவிப் பிணியிலிருந்து தப்பலாம் .

மெய்த் தானம் - உடம்பாகிய இடம் . அகம் படியுள் - உட்புறத்தில் . ஐவர் - ஐம்பொறி ; இவை பருவுடம்பாய் ( தூலதேகமாய் ) நின்று புறத்துள்ள புலன்களைக் கவர்தல் பற்றிப் ` புறக்கருவி ` எனப்படுமாயினும் , அங்ஙனம் கவரும் ஆற்றல்கள் அவ்வுடம்பினுள் அருவாயே நிற்றலின் . ` மெய்த்தானத்து அகம் படியுள் நின்று ` என்று அருளிச்செய்தார் . வேண்டிற்றுக் குறை - விரும்பியதாகிய இன்றியமையாப் பொருளை . முடித்து - தந்து நிரப்பி . கூடு - தங்கும் இடம் . ` இத் தானம் ` என்றது மேற்குறித்த மெய்த்தானத்தை . ஏழைமை - அறியாமை . மைத்து ஆன நீள் நயனி - மையணிந்ததாகிய நீண்ட கண்ணையுடையவள் ; உமை . வங்கம் - மரக்கலம் . ` என்று ` என்பது , ` நினையுமா ` என்பதனோடு இயையும் . நினையுமா நினைந்தக்கால் - நினையுமாற்றை நினைந்தால் . நினைதல் உளதாகுமாயின் செயல் நிகழ்தல் ஒருதலையாகலின் , ` நினைந்தக்கால் உய்யலாம் ` என்றருளி னார் . ` சிவதலத்தைப் பெயரளவில் நினைப்பினும் உய்திகூடும் ` என்பதுணர்த்துவார் , ` நகர் என்று நினையுமா நினைந்தக்கால் ` என்று அருளிச்செய்தார் . ` ஐவர் இவ்வுடம்பகத்தில் நின்று வேண்டி நிற்குங் குறையை அவர்க்கு முடித்துத் தந்துகொண்டு இவ்வுடம்பிற்றானே நீங்கா திருந்து பிழைக்க எண்ணுகின்ற அறியாமையுடைய நெஞ்சே , இவ்வெண்ணம் முடியாதாகலின் இதனைவிட்டொழி ; யான் சொல்லுவதைக்கேள் ; ` அருளின் வடிவாகிய அம்மையை நீக்காது உடன்கொண்டு விளங்குபவனும் , தேவர் பொருட்டு நஞ்சினை உண்டு அவரைக் காத்த அருளாளனும் ஆகிய இறைவன் எழுந்தருளியிருக்கும் திருநெய்த்தானம் என்னும் நல்ல தலம் என்று நினையும் நெறியை நினைவையாயின் , உய்தல் கூடும் ` என உரைத்துக்கொள்க . ` நினையுமாற்றால் நினைந்தக்கால் ` என்றுரைத்தலுமாம் . இப்பொருட்கு , ` என்று ` என்பது , ` நினைந்தக்கால் ` என்பதனோடு இயையும் . ` நினையுமாறு ` என்பது , கடைக்குறையாயிற்று .

நெஞ்சமே ! நான் கூறுவதனைக் கேள் ! பிறப்புக்கள் பலவற்றிற்கு ஏதுவாகி நீங்காத இவ்வுடல் தொடர்பிலிருந்து விரைவாக நீங்குதற்குரிய வழி உள்ளது என்பதனை யான் நினக்குக் கூறல் வேண்டா . தேவர்கள் தலைவராய் , இவ்வுலகிலே என்னை அடிமை கொண்டவராய் , மலையை வில்லாகக் கொண்டு மும்மதில்களையும் அழித்த பெருமானாராய்த் திருமாலும் பிரமனும் காணா வண்ணம் தீப்பிழம்பாய் நீண்டவராய் உள்ளவர் உகந்தருளியிருக்கும் நெய்த்தானம் என்ற தலத்தைத் தியானிக்கும் வழியை விரும்பி நினைப்பாயானால் பிறவிப்பிணியிலிருந்து தப்பித்தல் கூடும் .

` விரைய ` எனப் பொருள்தரும் ` ஈண்ட ` என்பது , எதுகை நோக்கி நீண்டது ; ` ஈண்ட நீங்கலாம் ` என இயையும் . பிறவித் துறவா ஆக்கை இது - பிறப்புக்கள் பலவற்றிற்கும் ஏதுவாகிய நீக்கலாகாத உடம்பாகிய இதனினின்றும் ; நுண்ணுடம்பின் ( சூக்கும தேகத்தின் ) நின்றும் . இதனான் நுண்ணுடம்பின் இயல்பும் உணர்ந்து கொள்ளப்படும் . கட்டு நீங்கி வீடெய்தும்பொழுதே நுண்ணுடம்பு நீங்குவதாகும் . விதி - வினை . ` ஆர் மண்ணில் ` எனவும் , ` ஐ அரி ` எனவும் பிரித்து , ` நிறைந்த மண்ணாலியன்ற உலகத்தில் ` எனவும் , ` அழகிய திருமால் ` எனவும் உரைக்க ` அம்மானை ` என்னும் ஐகாரத்தைச் சாரியை என்றலுமாம் . உம்மை , சிறப்பு . ` துறை ` என்பது . ` இடம் ` என்னும் பொருளது .

நெஞ்சே ! நான் கூறுவதைக் கேள் . உலகெங்கும் தேவை என்று கருதிப் பலபொருள்களையும் தேடித் திரிந்து பாழான இவ்வுடம்பிலே கிடந்து பின்விளைவை நோக்காது , உற்றார் உறவினரோடு கூடி வாழும் குடும்ப வாழ்க்கையை வாழ எண்ணி உடைந்து போதலை நீக்கு . பன்னிரு ஆதித்தர் முதலாகிய வானவர் இனத்தைச் சேர்ந்த கணக்கற்ற தேவர் கூட்டத்தார் ஒன்று சேர்ந்தாலும் தன் புகழை முழுமையாகச் சொல்ல முடியாத சிவபெருமானுடைய நெய்த்தானத்தை நினையுமா நினைத்தக்கால் உய்யலாம் .

` தேடிப் பரவி ஓடி ` எனக் கூட்டுக . பரவி - எங்குமாய் . வாளா - பின்விளைவை நோக்காது ; ` குரவை ` என்பது ` ` குரவி ` என வந்தது ; அது கைகோத்து ஆடுங் கூத்தாகலின் , ஒக்கலோடும் மக்களொடும் பிணைந்து வாழும் குடி வாழ்க்கையை ` குரவிக் குடிவாழ்க்கை ` என்றருளினார் . குலைகை - உடைதல் . இரவிக் குலம் - சூரியர் கூட்டம் ; சூரியர் பன்னிருவர் எனப்படுதலின் , இவ்வாறருளிச் செய்தார் . ` கூடி ` என்பதன்கண் தொகுக்கப்பட்ட பெயரெச்ச அகரம் விரித்து . ` ஆயம் ` என்பதனோடு முடிக்க . ` அமரர் ` என்றது வாளா பெயராய் நின்றது . ` ஆயம் - கூட்டம் . ` நிரவிக்க ` என்பதன் இறுதிநிலை தொகுத்தலாயிற்று . இப் பிறவினைக் சொல் , ` அளவு படுதல் ` எனத் தன்வினைப் பொருளே தந்து நின்றது . இனி , ` நிறைவிக்க , என்பதன் திரிபாகக் கொண்டு , ` அளவறிய ` என்றுரைத்தலுமாம் .

நெஞ்சமே ! அலைகள் போல ஓயாது செயற்படும் வினைக் கூறுகளுக்குச் சார்பாகிய இவ்வுடம்பில் அகப்பட்டு , ஆசை என்னும் கயிற்றால் சுருக்கிடப்படுமாறு தலையைக் கொடுத்து , கீழான இந்த உலக வாழ்வில் முழுகி மிகத் தளர்ந்து , நீ அஞ்சுதல் வேண்டா . இலைகளிடையே தோன்றும் கொன்றைப் பூ , கங்கை , பிறை இவற்றைப் பெரிய சடையிலே வைத்து மகிழ்ந்தவனாய்த் தேவர்கள் போற்றும் மேம்பட்ட நிலையிலுள்ளவனாகிய சிவபெருமான் உகந்தருளியிருக்கும் நெய்த்தானம் என்று நினையுமா நினைத்தக்கால் உய்யலாகும் .

அலை ஆர் வினைத் திறம்சேர் ஆக்கை - அலைபோல ( இடையறாது வந்து ) பொருந்தும் வினைக் கூறுகட்குச் சார்பாகிய உடம்பு . உள் ஆசை - மனத்தின்கண் எழும் ஆசை . ` ஆசையெனும் பாசம் ` என்றது உருவகம் . ` பாசந்தன்னுள் ` என்பது , ` பாசத்து அகப் படுந்தன்மையில் ` என்னும் பொருளது . ` இலையார் கொன்றை , புனக்கொன்றை ` எனத் தனித்தனி முடிக்க . ` புனற் கொன்றை ` என்பது பாடமன்று .

நெஞ்சே ! உரிய காலம் முடிந்த பின் சிறிது நேரமும் தாமதிக்காமல் உயிர்விடுத்து நீங்கும் இவ்வுடம்பை மேம்பட்ட பொருளாகப் பெரிதும் கருதி நம் புத்தியினாலே இந்த உலகம் முழுதையும் நமக்கு அடிமைப்படுத்தலாம் என்று பேசும் தன் முனைப்பை நீக்கு . தேவர்களுக்காகப் பகைத்து வந்த மதில்கள் மூன்றும் அழியுமாறு முன்னொரு காலத்தில் விரைவாகத் தூக்கிய வில்லை வளைத்து அம்மதில்களைத் தீக்கு இரையாக்க நினைத்துச் செயற்பட்ட பெரிய கருணையை உடைய சிவபெருமான் உகந்தருளியிருக்கும் நெய்த்தானம் என்று நினையுமா நினைத்தக்கால் உய்யலாகும் .

` தினைத்தனையும் ` என்னும் உம்மை தொகுத்தலாயிற்று . ஓர் ( ஒன்று ) - சிறிது . பொறை - பொறுத்தல் ; தாமதித்தல் ; நிலைபெறுதல் . ` மதியால் பேசும் ` என இயையும் . ` உனக்கு உள்ள மதியைப் பெரிதாக நினைந்து பேசுகின்ற ` என்பது பொருளாம் . ` அமரர்க்காக நினைத்த ` என இயையும் . முனைத்து - முற்பட்டு . முடுகிய - விரைந்த ; விரைய எடுத்த .

நெஞ்சே ! துன்பமே விளைக்கின்ற இந்த உடலில் வாழும் வாழ்வு நிலையானது என்று கருதி வினைப்பயனிலே கிடந்து ஈடுபட்டு மகிழாதே . தம்மைப் பற்றித் தாழ்வாகக் கருதுபவர் மனத்து இருப்பவனாய் , முருகனுக்குத் தந்தையாய் , கூத்தாடுதலைப் பண்பாக உடையவனாய் , கொல்லும் முத்தலை வேல் ஏந்திய கையனாய்த் திருவடிகளில் , கழலும் , சிலம்பும் ஒலிக்க இவ்வுலகமே பெயருமாறு ஆடும் ஊழிக் கூத்தில் மனநிறையுடையவனாகிய சிவபெருமானுடைய திருத்தலமாகிய நெய்த்தானம் என்று நினையுமா நினைத்தக்கால் உய்யலாம் .

மிறைபடும் - துன்பமே விளைகின்ற . வினை - வினைப்பயன் . வியவேல் - மகிழாதே . குறைவு - தாழ்வு ; பணிவு . வேல் - சூலம் . கழலும் , சிலம்பும் மாதொரு கூறன் ஆதலை உணர்த்தும் . நட்டம் நின்ற - நடனத்தொடு நின்ற . நிறைவு , எல்லா நலங்களும் நிரம்பியிருத்தல் . பெயர - பெயருமாறு ; பெயர , ஆர்ப்ப என மேலே கூட்டி , ` உலகம் முற்றும் பெயர்ந்த பின் ( ஒடுங்கியபின் ) நடனத்தொடு நின்ற நிறைவுடையான் ` என்றுரைத்தலுமாம் . இப்பொருட்கு , நிறைவு . தன்னைப் பெயர்ப்பார் இன்றித் தானே எல்லாவற்றையும் பெயர்ப்போனாய் நிற்கும் முழுமுதற் றன்மை .

நெஞ்சே ! வருக . பேசுதற்கு ஏற்ற உயர்ந்த பொருள் அல்லாத இப்பிறவியைக் கிட்டுதற்கு அரிய பொருளாக உன் அற்பப்புத்தியில் கருதி நறுமணம் கமழும் கூந்தலையுடைய மகளிர் இன்பம் என்னும் வலையில் அகப்பட்டு அழியாமல் , யானைத்தோலை உரித்துப் போர்த்துத்தூய திருநீறு பூசிப் பூணூல் அணிந்து , தன்னை அணுகாத கீழ்மக்களுக்கு அரியவனாயுள்ள சிவபெருமானுடைய நெய்த்தானம் என்று நினையுமா நினைந்தக்கால் உய்யலாம் .

` பிறவி ` என்றது , உடலை . வேண்டி - விரும்பி . ` மனம் ` என்றது அதன் குணத்தை . வருக - என்வழி வருக . தூசு - ஆடை ; போர்வை . அகரம் , சாரியை . துதைந்து - நிறைந்து .

நெஞ்சே ! ஐம்புலன்களால் நினைத்தவாறு செயற்படுத்தப்பட்டுக் கொடிய நோய்களுக்கு இருப்பிடமாகிய இவ்வுடலில் நிலையாமையை உனக்குப்புகலிடம் என்று கருதி ஐம்புல இன்பத்தில் ஆழ்ந்து போகாதே . தன்னைப் பற்றுக் கோடாக அடையாத வஞ்சமனத்தவர் காண முடியாத நீலகண்டனாய்த் தேவர்கள் தலைவன் என்று போற்றப்படும் மனத்துக்கினிய சிவபெருமானுடைய நெய்த்தானம் என்று நினையுமா நினைந்தக்கால் உய்யலாம் .

` அஞ்ச` என்பதில் அகரம் சாரியை . ` புலன் ஆட்ட இவற்றால் ஆட்டுண்டு ` எனக் கூட்டுக . தஞ்சம் - புகலிடம் . தாழேல் - அழுந்தாதே . ` தாழக் கருதுதியே ; ( அவ்வாறு ) தாழேல் ` எனக் கூட்டுக .

நெஞ்சே ! தகுதியற்ற இவ்வுடலில் வினைவயத்தால் புகுந்த உயிர் இதனை எந்த நேரத்திலும் விடுத்து நீங்கிவிடும் என்பதனை அறிந்தும் கீழான ஐம்புல நுகர்ச்சி வாழ்வினையே கருதிக் கொண்டிருந்து துயர்ப்படல் வேண்டா . தேவர்கள் தலைவனாய் , ஒருகாலத்தில் பார்வதி அஞ்சுமாறு , கரிய அடிகளை உடைய மதயானை அஞ்ச அதனை வெகுண்டவனாய் , நெற்றிக் கண்ணனாய் , தன்னைப் பரம்பொருளாகக் கருதாதவர் கூடி நிகழ்த்திய வேள்வியைப் போரிட்டு அழித்தவனாய் , நிலையாக உகந்தருளியிருக்கும் நெய்த்தானம் என்று நினையுமா நினைந்தக்கால் உய்யலாம் .

பொருந்தாத உடல் - தகுதியற்ற ( இழிவுடைய ) உடம்பு . ` அறிந்தும் அறிந்தும் ` என்னும் உம்மைகள் தொகுத்தலாயின . அடுக்குப் பன்மை பற்றி வந்தது . அறிதல் - ஏனைய பலரிடத்து வைத்தென்க . புலை - கீழ்மை . ` ஆங்கு இருந்து நீ இடர்ப்படவேண்டா ` என மாறிக் கூட்டுக . தாள் - முயற்சி ; வலிமை . கருதார் - பகைவர் ; பன்மை கூறியது . பலரும் ஒருவன் செயலுக்கு உடம்பட்டமை கருதி . ` கருதார் வேள்வி கண்டு அமராடி உறை நெய்த்தானம் ` எனக் கொண்டு கூட்டியுரைக்க . ` அமராடி ` என்றது பெயர் ; எச்சமாக ஓதுதல் பாடம் அன்று . நிரந்தரமா - நிலையாக .

விரதங்களை எல்லாம் மேற்கொண்டு தவ வாழ்வு வாழ முயன்று வாழாத நெஞ்சே ! நிலையாமையை உடைய இவ்வுடல் என்றும் உள்ள உயிரைப்பற்ற வேண்டிய உனக்கு உரிய பொருள் அன்று . உண்மையை உனக்குக் கூறிவிட்டேன் . தம்மிடத்துப் பொருளில்லாத வறியவர்களுக்கு ஒன்றும் ஈயாதவர்களுக்குத் தானும் எதுவும் ஈயாதவனாய்த் திரிபுரங்களை எரித்தவனாய்க் கையில் தீயை உடையவனாய் எட்டுத் தோள்களை உடைய எம்பெருமானே என்று தன்னைத் துதிக்காத இலங்கை மன்னனான இராவணனை நெரித்த , நெய்த்தானம் என்ற திருத்தலத்தை உகந்தருளி உறைகின்ற பெருமானை நினையுமா நினைந்தக்கால் உய்யலாம் .

உடலின் தன்மையை உயிர் தன் தன்மையாகக் கோடல் மயக்க உணர்வாகலின் , ` இவ்வுடலின் தன்மை உனக்கு உரித்தன்று ` எனத் தெளிவித்தருளினார் ; இதனான் ஆன்ம தரிசனம் செய்வித்த வாறாயிற்று . ` உண்மை யுரைத்தேன் ` என்றது , ` நீ உணர்வுபெறக் கூறினேன் ; கேளாதொழியின் , வருவது காண்டி ` என்றருளியவாறு . வருவது , பிறவித் துன்பம் . `விரதம் தரித்தும் , தவம் முயன்றும் வாழா நெஞ்சே` என்பதனை முதற்கண் கொண்டுரைக்க . தரித்தல் - மேற்கொள்ளுதல் . இதனால் , ` நீதானே உணராதும் , உணர்த்தியும் உணராதும் நிற்கின்றாய் ` என்றபடி . எனவே , ` ஆன்மாக்களுக்கு முற்செய்தவத்தான் ஞானம் நிகழும் ` ( சிவஞானபோதம் சூத்திரம் 8 அதிகரணம் 1. ) என்பது பெறப்பட்டது . தம்மிடையில் இல்லார்க்கு ஒன்று அல்லார்க்கு அன்னன் - தம்மிடத்துப் பொருள் இலராகிய வறியவர்க்கு ஒன்றும் ஈயாதவர்க்கு அத்தன்மையனாய் ஒன்றும் ஈயாதவனே . ` எரித்தான் ` என்பதன் ஈற்று அகரம் தொகுக்கப்பட்டது ; எரிதலுடைத்தான ` என்பது பொருள் - ` அன்னன் , உடையான் , பெருமான் ` என்பன விளிகள் .