திருமாலால் விண்ணுலகிலிருந்து கொண்டு வந்து நிறுவப்பெற்ற விமானத்தை உடைய குளிர்ந்த வீழிமிழலையில் உள்ள பெருமான் , கண்ணாய் கண்ணினது ஒளிசேர்தலால் உண்டாகும் காணுதல் தொழிலாய்ப் பாட்டின்கண் உள்ள இசையாகிய இலக்கியத்தில் வைத்துக் காட்டப்படுகின்ற பண்ணாய் , அப்பண்களின் உட்பிரிவுகளாய்ப் பழமாய்ச் சுவையாய்ப் பயன்தருகின்றவனாய் , மண் , நீர் , தீ எல்லாவற்றையும் அசைக்கும் காற்று , நீர் உட்கொண்ட மேகம் சேரும் வானம் என்ற ஐம்பூதங்களாய் , தேவர்களுக்கு மேம்பட்டவனாய் உள்ளான் .

` கண்ணவன் ` முதலியவற்றில் அகரம் , சாரியை , இறைவன் உயிர்களோடும் உலகத்தோடும் பொருந்தி நிற்கும் நிலையில் , கலப்பினால் அப்பொருள்களேயாகியும் , தன் தன்மையால் தானேயாகியும் , அவைகளை உடன்நின்று இயக்கும் முறையால் அவைகளும் தானுமாகியும் நிற்பன் . இந்நிலைகள் முறையே ` ஒன்றாய் ( அபேதமாய் ), வேறாய் ( பேதமாய் ), உடனாய் ( பேதா பேதமாய் ) நிற்றல் ` எனக் கூறப்படும் . இங்ஙனம் , ` பேதம் , அபேதம் , பேதாபேதம் ` என்னும் மூன்று நிலையும் தோன்ற , அம்மூன்றற்கும் பொதுவாய்ப் பொருந்தி நிற்கும் நிலையே , ` அத்வைத சம்பந்தம் ` எனப்படுகின்றது . ` பிரமப் பொருள் ஒன்றே ; அஃது அத்விதீயம் ` என்னும் உபநிடத வாக்கியத்திற்கும் இதுவே பொருளாகும் . இதுபற்றி வேறுவேறு கூறுவார் கூறுவனவெல்லாம் பொருந்தாமையை ஆசிரியர் மெய்கண்ட தேவ நாயனார் , தமது அரிய சிவஞானபோத நூலாலும் , அருணந்தி தேவ நாயனார் முதலிய அருள்மாணாக்கர்களுக்குச் செய்த உபதேசத்தாலும் இனிது விளங்கச்செய்தார் . அதனால் , அம்முதல்நூலின் பாடியத்தாலும் , வழிநூல் சார்பு நூல்களாலும் மேற்குறித்த பொருள் யாவரும் அறிய இனிது விளங்கித் திகழ்கின்றது . அவ்விளக்கங்களை உணர வேண்டுவார் , அந்நூல்களிலும் , பாடியத்திலும் பரக்கக் கண்டு கொள்க . இவ்வத்துவித நிலையில் , இறைவன் கலப்பினால் உலகமேயாய் நிற்கும் அபேதநிலையே , முதற்கண் உலகத்தை நிலைபெறுவித்தற்கு இன்றியமையாததாதல்பற்றி அதனையே அருளாசிரியர்கள் பெரும்பான்மையாகப் பலவிடங்களில் அருளிச் செய்வர் ; அவ்வாறு வருவது இத்திருப்பதிகம் ஆதலின் , ` கண்ணவன் காண் ` என்பது முதலியவற்றிற்கு , ` கண்ணாகி உள்ளவன் ` என்பதுமுதலியனபோலப் பொருள் கொள்க . இதற்கு முன்னும் பின்னும் இவ்வாறு பல திருப்பதிகங்கள் இருத்தலையும் அறிந்து கொள்க . கண் ஒளிசேர் காட்சி - கண்ணினது ஒளி சேர்தலால் உண்டாகும் காணுதற் றொழில் . கந்திருவம் - இசையிலக்கண நூல் . பாட்டு இசையில் காட்டுகின்ற - ( அந்நூல் ) பாட்டின்கண் உள்ள இசையாகிய இலக்கியத்தில் வைத்துத் தெரிவிக்கின்ற . திறல் - திறம் ; இசை , ` பண் , திறம் , திறத்திறம் ` என மூவகைப் படுதலின் , திறத்தையும் திறத்திறத்தையும் , ` திறல் ` என்றருளினார் . ` திறமானான் என்பதே பாடம் ` எனினும் அமையும் . பயக்கின்றான் - பயன் தருகின்றான் . மாருதன் - காற்றாய் உள்ளவன் . திருவீழிமிழலைக் கோயிலின் விமானம் , திருமாலால் விண்ணுலகத்திலிருந்து கொணர்ந்து நிறுவப் பட்டதாகலின் , ` விண் இழி தண் வீழிமிழலை ` என்றருளிச்செய்தார் .

விண்ணிழி தண் வீழிமிழலையான் ஆலையினின்றும் ஒழுகுகின்ற கரும்பின் சாறு போலத் தித்திக்கும் திருவைந்தெழுத்தைத் தனக்குப் பெயராக உடையவனாய் , நற்பண்புடைய அடியவர்களின் உள்ளத்தில் இருப்பவனாய் , வானில் திரியும் மும் மதில்களையும் தீக்கு இரையாக்கிய வில்லை உடையவனாய் , பால் , தயிர் , நெய் இவற்றால் அபிடேகிக்கப்படுபவனாய் , பண்டரங்கக் கூத்தாடுபவனாய் , சாம்பலை உடல் முழுதும் பூசியவடிவினனாய்ப் பிச்சை எடுப்பவனாய் , கடல் விடம் உண்டதால் நீலகண்டனாய் உள்ளான் .

ஆலைப் படு - ஆலையினின்றும் ஒழுகுகின்ற . அண்ணிக்கும் - தித்திக்கும் . எரி படுத்த - தீயின்கண் படுவித்த ; ஏழாம் வேற்றுமைத் தொகைக்கண் சிறுபான்மை வல்லெழுத்து மிகாமையறிக . ` எரிப்படுத்த ` என்பதே பாடம் எனலுமாம் . நெய் பலவாகலின் , ` நறு நெய் ` என அடைகொடுத்து உணர்த்துப . அடையில் வழிச் சொல்லுவார் குறிப்பால் , குறித்த பொருள் விளங்கும் . பண்டரங்க வேடம் - பாண்டரங்கம் என்னும் கூத்திற்குரிய வேடம் . வேலை - கடல் .

விண்ணிழிதண் வீழிமிழலையான் தண்மை வெம்மை என்ற இரு திறமும் உடையவனாய்த் திருமாலுக்குச் சக்கரத்தை அருளியவனாய் , மூன்று கண்களை உடையவனாய் , காபாலக்கூத்து ஆடுபவனாய்க் காமன் உடலைச் சாம்பலாக்கிய நெற்றிக்கண்ணனாய் , என் உள்ளத்தில் இருந்த சமண சமயப் பற்றினை நீக்கி என்னை ஆட்கொண்டவனாய் , பிரமன் திருமால் இருவருக்கும் தீப்பிழம்பாய்க் காட்சி வழங்கியவனாய்த் தேவர்கள் துதிக்குமாறு உள்ளான் .

` தண்மையும் வெம்மையும் தானே ஆயினான் ` என்றது , ` மாறுபட்ட பலவகை ஆற்றல்களும் தனது ஓர் ஆற்றலுள் அடங்க நிற்பவன் ` என்றருளியவாறு . புள் பாகன் - கருடனை ஊர்பவன் ; திருமால் . இது , திருமால் சிவபிரானை நாள்தோறும் ஆயிரம் தாமரைப் பூக்கள் கொண்டு வழிபட்டு , இறுதியில் ஒரு நாள் தனது கண்ணையே ஒரு தாமரை மலராகச் சாத்திச் சக்கரம் பெற்ற தலமாதல் அறிக . இதனை , ` நீற்றினை நிறையப் பூசி ` ( தி .4. ப .64. பா .8.) என்னும் இத்தலத் திருநேரிசையுள் விளங்க அருளிச்செய்தார் . எண் இல் - பொருளுணர்வு இல்லாத .

விண்இழி தண் வீழிமிழலையான் காதில் சங்கக் குழை அணிந்தவனாய்ப் பொன்மலைபோன்ற உருவத்தானாய்ப் பார்வதியின் மேம்பட்ட தவத்தைச் சோதித்தவனாய் , வலிய பன்றியின் வெள்ளிய கொம்பினை அணியாக அணிந்தவனாய் , எல்லாவற்றிற்கும் முற்பட்டவனாய் , அண்டங்களையும் கடந்து பரந்தவனாய் , ஐந்தலைப்பாம்பினைத் தன் வில்லுக்கு நாணாகக் கொண்டவனாய் , வேதம் ஓதுபவனாய் , வேத நெறியை உலகிற்கு உபதேசித்தவனாய் உள்ளான் .

கனகமலை - பொன்மலை . மாது - உமை ; அவள் தவத்தைச் சோதித்தமை முன்னுங் கூறப்பட்டது ( ப .50 பா .3). ஏனம் - பன்றி ; திருமால்கொண்ட வராக அவதாரம் . எயிறு - பல் ; கொம்பு . நாண் , அரைநாண் , வேதியன் - வேதத்தை ஓதுபவன் .

விண்இழி தண்வீழிமிழலையான் நெய் , பால் , இளநீர் இவற்றால் அபிடேகிக்கப்பட்டவனாய் , நித்திய கல்யாணனாகக் காட்சி வழங்குகின்றவனாய் , கைகளில் மழுவும் மானும் ஏந்தியவனாய்க் காலன் உயிரைத் தன் காலால் போக்கியவனாய்ச் சிவந்த அழகிய திருமேனியில் வெண்ணீறு அணிந்தவனாய்ச் செஞ்சடைமேல் வெண்பிறையைச் சேர்த்தியவனாய் , சூடான தீயில் கூத்தாடுபவனாய் உள்ளான் .

நித்த மணவாளன் - அழியாத மணக்கோலம் உடையவன் : ` நித்த மணாளர் நிரம்ப அழகியர் ` ( திருவாசகம் . அன்னைப் பத்து - 3) என்றருளியதுங் காண்க . இள நீராடுதலும் இங்கு அருளிச் செய்யப்பட்டது . ` நெருப்போடு விளையாடினான் ` என்பது நயம் .

விண்இழிதண் வீழிமிழலையான் எப்பொழுதும் அறிதுயில் கொள்ளும் திருமால் தனக்குச் சக்கராயுதம் வேண்டுமென்று செந்தாமரை போன்ற தன் கண் ஒன்றனைக் குறைந்த மலராகக் கொண்டு அருச்சித்த அதனைக்கண்டு அவனுக்குச் சக்கரம் அருளியவனாய் , வண்டுகள் உண்ணும் தேனை உடைய கொன்றை , வன்னி , ஊமத்தை என்னும் இவற்றை ஆகாய கங்கையோடு சடையில் மறைத்த பெரியதேவனாய் , பண்போன்ற இனிய சொற்களை உடைய பார்வதி பாகனாய் , மேம்பட்டவனாய் , உயர்ந்த இடத்தில் இருப்பவனாய்ப் பிறையைப் பாம்போடு சடையில் வைத்தவனாய் , அடியார் மனக்கண்ணுக்குக் காட்சி வழங்குகின்றான் .

கண் துஞ்சும் மால் - எப்பொழுதும் அறிதுயில் கொள்ளும் மாயோன் . மத்தம் - ஊமத்தை . பரமேட்டி ( பரம இஷ்டி ) மேலான வணக்கத்துக்கு உரியவன் .

விண்இழிதண் வீழிமிழலையான் மலைபோல விளங்கிய தோள்களை உடைய சலந்தரன் என்ற அசுரனுடைய உடலைப்பிளந்த சக்கராயுதத்தைத் திருமாலுக்கு வழங்கிய கருணையாளனாய் , வில் விளங்கும் தோளை உடைய அருச்சுனன் வலிமையைக் குறையச் செய்து வேடுவனாய் அவனோடு போர் செய்து தன் போர்த் திறமையைக் காட்டியவனாய் , மாயையின் மேம்பட்டதாகிய உயிரினும் மேம்பட்ட பொருளாய் இருக்கின்றவனாய்ச் சதாசிவனாய் , ஒப்பற்றவனாய் , பார்வதியைத் தானும் விரும்பி அவளால் விரும்பப்படுபவனாய் இருப்பவனாவான் .

கல் பொலி தோள் - மலைபோல விளங்கிய தோள் . பொருததும் விசயனோடேயாம் . காட்டியது , தனது போர்த்திறனை . தற்பரம் ( தத்பரம் ) - அதனின் மேம்பட்டது . ` தற்பரமாந் தற்பரம் ` என்பதற்கு , ` மாயையின் மேம்பட்டதாகிய உயிரினும் மேம்பட்ட பொருள் ` என்க . ` தற்பரமாய் நற்பரமாய் ` என்பதும் பாடம் . ` பாவை விருப்புளான் ` என்பதனை , ` பாவையினது விருப்பத்தை உடையவன் , பாவையை விரும்பும் விருப்பத்தை உடையவன் ` என இரட்டுற மொழிந்துகொள்க .

ஞானிகள் விரும்பிப்போற்றும் விண்இழிதண் வீழிமிழலையான் உண்மையான தவத்தில் ஈடுபட்டிருப்பவர்களுக்கு உள் பொருளாய் விளங்குபவனாய்த் தன் இடத்து விருப்பம் இல்லாத இரும்புபோன்ற கடிய மனத்தவர்களுக்குத் தன் உருவத்தைக் காட்டாது மறைந்தே இருப்பவனாய் , சாக்கியநாயனார் மறவாமல் இடும் சிறு கற்களைப் புதிய மலர்களாக ஏற்பவனாய் , தன்னைத் தியானித்தவர்களை உயர்கதிக்கண் செலுத்துபவனாய் , உலகங்களை அழித்துப் படைத்துக் காக்கும் திறல் உடையோனாய் உள்ளான் .

மெய்த்தவன் - பயனால் , உள்பொருளாய் விளங்கியவன் . ` நிற்பார்க்கெல்லாம் மெய்த்தவன் ` என முன்னே கூட்டுக . ` தன்னிடத்து விருப்பம் இல்லாத இரும்புபோலும் மனத்தையுடைய கன்மிகளுக்கு எஞ்ஞான்றும் எவ்வாற்றானும் தனது இருப்பினைப் புலப்படுத்தாது மறைந்தே நின்றவன் ` என்க . புத்தன் , சாக்கிய நாயனார் . சல்லி - கல் . மலர்கள் ஆக்கினான் - மலர்கள்போல நினைத்து ஏற்றுக்கொண்டவன் . ` உள்கினாரை உயர்கதிக்கே உய்த்தவன் ` எனக் கூட்டுக . உய்த்தல் - செலுத்துதல் . அளித்தல் - காத்தல் . வித்தகன் - திறனுடையவன் ; ஒளித்து நின்றே செய்தலின் , ` வித்தகன் ` என்றருளிச்செய்தார் . ` முந்நிலைக் காலமும் தோன்றும் இயற்கை ` ( தொல் . சொல் . 240) கிளவாது , தாம் அநுபவத்தால் அறிந்தது கிளத்தல் திருவுள்ளமாகலின் , இறந்த காலத்தால் அருளினார் ; இது பிறவிடத்தும் ஒக்கும் .

விண்இழிதண்வீழிமிழலையான் தக்கன் வேள்வியில் சந்திரனைத் திருவடியால் தேய்த்துத் தக்கனை வெகுண்டு எச்சன் தலையை நீக்கி இந்திரனுடைய தோள்களை ஒடித்துப்பின் அவர்களுக்கு அருள் செய்தவனாய் , எல்லோரையும் அடக்கி ஆள்பவனாய் , தன்னை விருப்போடு நினைப்பவர்களுக்கு அன்பனாய் , மந்திரமும் வேதப்பொருளும் ஆயினானாய்ப் பிரமனும் திருமாலும் மேலும் கீழும் அறியாவண்ணம் தீப்பிழம்பாய் நீண்டவனாய் உள்ளான் .

சந்திரனைத் தளர்வித்தது முதலியன , தக்கன் வேள்வியில் . நினைபவர் , மந்திரத்தினாலும் மறைப்பொருளாலுமே நினைதலின் , அவைகளாய் இருந்து அருள்செய்கின்றான் என்க .

விண்இழிதண் வீழிமிழலையான் இண்டங் கொடிகள் அடர்ந்த சுடுகாட்டில் இருப்பவனாய் , எங்கள் தலைவனாய் , யானைத்தோலைப் போர்த்தியவனாய்ப் பார்வதியோடு ஒரே உருவமாய் நின்றவனாய் , ஓங்காரவடிவினனாய் , கோங்கு கொன்றை ஆகிய மாலையை உடையவனாய்க் காளை எழுதிய கொடியை உடையவனாய் , வேங்கைத்தோலை மேலாடையாகக் கொண்ட வனாய் உள்ளான் .

ஈங்கை - இண்டங் கொடி . ஈமவனம் ( சுடுகாடு ). இரு பெயரொட்டு . கைம்மா - யானை . ` கொல்லேற்றைக் கொடி மேற் கூட்டினான் ` என்க .