நிறம் வாய்ந்த மணிபோன்ற அழகுடையவனும் , கொட்டையூரிலுள்ள கோடீச்சரத்துறையும் , தலைவனுமாகிய சிவ பெருமான் நீலமணி போற்றிகழும் கரிய கழுத்தால் அழகு மிக்கவனும் கல்லால மரநிழலில் இருந்தவனும் , பருத்த மணிகளை உடைய பெரிய பாம்பினை அணியாகப் பூண்டவனும் , பவளக்குன்றுபோல் காட்சியளிக்கும் மேலோனும் , தெளிந்த நீர் ஓடிவரும் காவிரியின் கரையில் உள்ள வலஞ்சுழியில் உறைபவனும் , தேவர்க்கெல்லாம் தலைவன் ஆகிய தேவனும் , யாவர்க்கும் வரமருளும் வரதனும் ஆவான் .

கருமணி - நீலமணி . பருமணி - பருத்த ( பெரிய மாணிக்கம் . மணி நீர் - அழகிய நீர் . மா தேவன் - ( தேவர்கட்கெல்லாம் ) பெரிய தேவன் . வரதன் - வரத்தைக் கொடுப்பவன் . குருமணி - நிறம் வாய்ந்த மணி . ` அழகமருங் கோமான் , கோடீச்சரத்துறையுங் கோமான் ` எனத் தனித்தனி முடிக்க . ` கோடீச்சரம் ` என்பது , திருக் கோயிலின் பெயர் .

குலைகளை உடைய தெங்குகள் நிறைந்த சோலையால் சூழப்பட்ட கொட்டையூரிலுள்ள கோடீச்சரத்துறையும் தலைவன் ஆகிய சிவபெருமான் மான்கன்றை ஏந்திய கரத்தனும் , கலைகளைப் பயில்வோருக்கு ஞானக் கண்ணாய் விளங்குபவனும் , அலைகள் பொருந்திய கங்கையாற்றைத் தன்செஞ்சடையில் ஏற்றவனும் , அண்டச் சுவரின் உச்சிக்கும் அப்பாலவனும் , மலைபடுபொருள்களை அடித்துக்கொண்டுவரும் நீரையுடைய காவிரியின் கரையிலுள்ள வலஞ்சுழியிடத்து மேவிய மைந்தனும் ஆவான் .

கலை - மான் . ஞானக் கண் - அறிவாகிய கண் ; உருவகம் ; ` கற்பார்க்கு அக்கல்வியறிவாய் நின்று பயன் தருவோன் ` என்றபடி . கபாலம் - தலை ஓடு ; ` அண்ட கபாலம் ` என்றது , அண்டச் சுவரின் உச்சியை . மலைப் பண்டம் - மலையில் விளையும் பொருள்கள் ; அவை , ` அகில் , சந்தனம் , யானைத் தந்தம் ` முதலியன . தெங்கு - தென்னை .

பூங்கொத்துக்கள் நிறைந்த சோலைகள் நான்கு பக்கங்களிலும் சூழ விளங்கும் கொட்டையூரில் உள்ள கோடீச்சரத்து உறையும் தலைவன் செந்தாமரை மலரை அணிந்தவனும் , சிவன் என்னும் நாமம் தனக்கே உரியவனும் , தேவர்க்குத் தலைவனும் , பந்தாடும் மெல்லியவிரல்களையுடைய பார்வதியைத் தன் ஆகத்தின் பாகத்தில் கொண்டவனும் , பால் , தயிர் , நெய் , தேன் இவற்றில் ஆடப் பெறுபவனும் , மந்தார மரங்களைத் தள்ளிக் கொண்டு வரும் நீரையுடைய காவிரியின் கரையிலுள்ள வலஞ்சுழியிடத்து நிலைபெற்று நிற்கும் மணவாளனும் ஆவான் .

மலர்களுட் சிறந்தது தாமரை மலரும் , தாமரை மலர்களுள்ளும் சிறந்தது செந்தாமரையும் ஆதல்பற்றி , ` செந் தாமரைப்போ தணிந்தான் கண்டாய் ` என்று அருளினார் . ` பூவிற்குத் தாமரையே ` ( திருவள்ளுவமாலை - 36.), ` பூவெனப்படுவது பொறிவாழ் பூவே ` ( நால்வர் நான்மணிமாலை - 40) என வந்தனவுங் காண்க . சிவன் - மங்கலம் உடையவன் . மந்தாரம் , ஒருவகை மரம் . உந்தி - புரட்டி . கொந்து - ( மலர்க் ) கொத்து .

துகில் கொடிகள் அசையும் உயர்ந்த மாடங்கள் நிறைந்த கொட்டையூரில் உள்ள கோடீச்சரத்துறையும் தலைவனாகிய சிவபெருமான் திருநீறு திகழுந் திருமேனியை உடைய புனிதனும் , கருட வாகனனாகிய திருமாலுக்குச் சக்கராயுதத்தை உதவியவனும் , இடிபோன்று அச்சந்தரும் முழக்கத்தையுடைய இடபத்தினை ஊர்பவனும் , எட்டுத் திசைகளுக்கும் விளக்கமாய் நிற்பவனும் , பூவிதழ்களைச் சுமந்த அலைகள் புரளும் காவிரியின் கரையிலுள்ள வலஞ்சுழியிடத்துப் பொருந்திய மைந்தனும் ஆவான் .

பொடி - திருநீறு . புள் பாகன் - பறவை ( கருட ) வாகனத்தை உடையவன் ; திருமால் . ஆழி - சக்கரம் . இடி ஆர் - இடிபோலும் ; ஆர் , உவம உருபு . ஏறு - இடபம் . எண்டிசைக்கும் விளக்கு - உலக முழுதிற்கும் ஒளியைத்தரும் விளக்கு . மடல் - பூ ; சினையாகுபெயர் . கொடி ஆடு - துகிற் கொடிகள் அசைகின்ற .

கொக்குக்கள் அமர்ந்திருக்கும் வயல்கள் நாற்புறமும் சூழ்ந்துள்ள கொட்டையூரில் கோடீச்சரத்துறையும் தலைவனாகிய சிவபெருமான் , சங்கு மணியையும் , பாம்பையும் இடையில் கட்டியவனாய் , உணர்தற்கரிய நான்மறைகளும் ஆறங்கங்களும் ஆனவனாய் , தக்கனது பெருவேள்வியைத் தகர்த்தவனாய் , சதாசிவனாய் , சலந்தரன் உடலைப் பிளந்தவனாய் , நீலநிற மயிற் பீலியை அடித்துக் கொண்டு வரும் நீரினையுடைய காவிரியின் கரையிலுள்ள வலஞ்சுழியில் வாழ்பவனாய் , கையில் மழு ஏந்தியவனாய் விளங்குபவன் ஆவான் .

மைக் கொள் மயில் - கருமை ( நீல ) நிறத்தைக் கொண்ட மயில் ; இனி , ` மேகத்தை விரும்புகின்ற ` என்றும் ஆம் . ககர ஒற்று , விரித்தல் . ` தழை ` என்றது , தோகையை . ` கொக்கு அமரும் வயல் ` என்றது , ` நீர் நீங்காத வயல் ` என்பதைக் குறித்த குறிப்புமொழி .

கொடிகள் கட்டப்பட்டு , மேகங்கள் தவழும் வண்ணம் மிக உயர்ந்த மாடங்களைக் கொண்ட கொட்டையூரிலுள்ள கோடீச்சரத்துறையும் தலைவனாகிய சிவபெருமான் , சண்டேசுரனை நல்ல தேவர்கள் தொழுமாறு செய்தவனும் , சதாசிவனும் , சங்கரனும் , தொண்டர் பலரும் புகழ்ந்து வணங்கும் திருவடிகளை உடையவனும் , பற்றிப் பின் தொடர்வதற்கு அரிய பேரொளிப் பிழம்பாய் நின்றவனும் , மிக்குவரும் புனலையுடைய காவிரியின் கரையிலுள்ள வலஞ்சுழியில் வாழ்பவனும் , பெருமைமிக்க தவத்தவர் நுகரும் அமிர்தமும் ஆவான் .

` சண்டன் ` என்றது , சண்டேசுவர நாயனாரை , அண்டர் - தேவர் . ` அரிதாய் ` என்பதற்கு , ` அரிய பொருளாய் , என உரைக்க . ` மாமுனிவர் தம்முடைய மருந்து ` என்றது ` ` தேவர்கள் அமுதத்தை இறப்பை நீக்கும் மருந்தாக விரும்பி உண்பர் ; பெருமை பொருந்திய தவத்தோர் அவ்வாறன்றிச் சிவபிரானையே அம் மருந்தாக அறிந்து அடைவர் ` என்றதாம் . கொண்டல் - மேகம் .

நற்குணமிக்க அடியார்கள் வாழ்கின்ற கொட்டை யூரிலுள்ள கோடீச்சரத்துறையும் தலைவனாகிய சிவபெருமான் , எட்டுதற்கரியவனாய் , குற்றமற்றவனாய் , அழிவில்லாதவனாய் , மேலுலகத்து உள்ளவனாய் , படமுடைய பெரிய நாகத்தை அணிபவனாய் , பண்டரங்கக் கூத்தினை ஆடுபவனாய் , ஐசுவரியம் முதலிய ஆறு குணங்களை உடையவனாய் , மணலை வாரிக் கொண்டுவரும் நீரையுடைய காவிரியின் கரையிலுள்ள வலஞ்சுழியில் வாழ்பவனாய் , திருமாலுக்கும் பிரமனுக்கும் அவர்கள் விரும்பிய அதிகாரத்தை வழங்குபவனாய் விளங்குபவன் ஆவான் .

அணவுதல் - எட்டுதல் . ` அணைவரியான் ` என்பதும் பாடம் . அவிநாசி - அழிவில்லாதவன் . அண்டத்தான் - மேல் உலகத்தில் இருப்பவன் . பணம் - பாம்பின் படம் . மாதவன் - திருமால் . வரதன் - வரத்தைக் ( அவர்கள் விரும்பிய அதிகாரத்தை ) கொடுப்பவன் .

குராமரங்கள் நிறைந்த சோலைகள் நாற்புறமுஞ் சூழ்ந்த கொட்டையூரிலுள்ள கோடீச்சரத்துறையும் தலைவனாகிய சிவ பெருமான் . மணங்கமழும் கொன்றைப் பூ மாலையை உடையவனும் , வேதங்களால் போற்றப்படும் தலைவனும் , புள்ளிகளை உடைய புலித் தோலை இடையில் உடையாக உடுத்தியவனும் , அழலாடுபவனும் , அழகனும் , தொடர்ந்து வரும் அலைகளையுடையதும் நீர் நிரம்பியதும் ஆகிய காவிரியின் கரையிலுள்ள வலஞ்சுழியில் வாழ்பவனும் , வஞ்சமனத்தாரால் உணரப்படாத மைந்தனும் ஆவான் .

விரை - வாசனை . வேதங்கள் தொழநின்ற நாதன் - வேதங்களால் போற்றப்படும் முதல்வன் . ` குரா ` என்பது , குரவு ` என நின்றது . குரா , ஒருவகை மரம் . அமரும் - பொருந்தியுள்ள .

குளிர்ந்த குளங்களில் செங்குவளை மலர் மேலெழுந்து விளங்கும் கொட்டையூரிலுள்ள கோடீச்சரத்துறையும் தலைவனாகிய சிவபெருமான் , இதழ்கள் மிக்க தாமரை மலரை ஆதனமாக உடையவனாய் , தயரதராமனுடைய துன்பங்களைக் களைந்தவனாய் , இளம்பிறையையும் பாம்பினையும் கங்கையையும் . தன் பழைய சடையில் வைத்தவனாய் , கலைகள் அறுபத்து நான்கும் ஆனவனாய் , வளத்தை மிகுவிக்கும் நீர்ப் பெருக்கினையுடைய காவிரியின் கரையிலுள்ள வலஞ்சுழியில் வாழ்பவனாய் , முனிவர்கள் வணங்கி எழும் பொற்பாதங்களை உடையவனாய் விளங்குபவன் ஆவான் .

தளம் - இதழ் . தசரதன் மகன் - இராமன் . அசைவு - தளர்ச்சி ; அது , சீதையை இழந்து பின்னர் அடைந்த துன்பத்தையும் சீதையை மீட்ட பின்னர் இராவணனைக் கொன்ற பழியினால் எய்திய துன்பத்தையும் குறிக்கும் . இவ்விரு துன்பங்களையும் இராமன் , சிவபிரானைப் பூசித்து நீங்கப்பெற்றனன் என்பதே உண்மை இராமாயணம் . என்பது இன்றைய இராமாயணத்திலும் காணப்படுவது , பிற வாக்கியங்கள் இஞ்ஞான்று அதன் கண் காணப்படாதொழியினும் அவற்றை அறிவிக்கும் தலங்கள் அவற்றிற்கு என்றும் சான்றாய் நின்று நிலவும் . எட்டு எட்டு இருங்கலைகள் - ` அறுபத்து நான்கு ` என வரையறை கூறப்படும் பெரிய கலைகள் . ` மா முனிகள் ` என்றது , தல வரலாற்றின்படி , ஏரண்டரையும் , மார்க்கண்டேயரையும் சிறப்பாகக் குறிக்கும் . ` குளம் கிளர் என இயையும் , ஏழாவதன் தொகையில் மகரம் , கெடாது நின்று திரிந்தது . கிளர் - மிக்கு விளக்குகின்ற .

ஓதிய நான்மறை ஆறங்க , வழிஒழுகும் வேதியர்கள் வாழ்கின்ற கொட்டையூரிலுள்ள கோடீச்சரத்துறையும் தலைவனாகிய சிவபெருமான் , பகைவர் புரமூன்றையும் எரித்தவனும் , வலிய அரக்கனாகிய இராவணன் உடலைக் கயிலை மலையின் கீழ் வைத்துச் சிதைத்தவனும் , குளிர்ந்த தாமரையில் வாழ் நான்முகனும் திருமாலும் தேட நெருப்புப் பிழம்பாய் நீண்டவனாகிய கழலை உடையவனும் , வண்டுகள் மொய்க்கும் பூஞ்சோலைகள் மிக்க வலஞ்சுழியில் வாழ்பவனும் , தேவர்க்குத் தேவனும் ஆவான் .

விண்டார் - பகைவர் . விலங்கலில் - ( கயிலாய ) மலையின்கீழ் . அடர்த்தான் - சிதைத்தான் . இறைவனது ஆற்றலை ( சத்தியை ) த் திருவடியாகக் கூறும் மரபு பற்றி , ` கழலான் ` என்று அருளிச் செய்தாராகலின் , அதற்கு ` சத்தியை உடையவன் ` எனப் பொருள் கூறுக .