திருவாவடுதுறையில் எழுந்தருளியுள்ள , எங்கள் முதற்கடவுளே , உன்னை , அந்தணனாகிய பிரமசாரி ஒருவன் அன்புடன் வந்து அடைய , அவனது அரிய உயிரைப் போகாது நிறுத்த வேண்டி , உதிரத்தைக்கொண்ட சூலத்தையுடைய இயமனைக் காலால் உதைத்துக்கொன்ற காரணத்தை உணர்ந்து உணர்ந்து , அடியேன் , ` யாவர்க்கும் முதல்வன் ; எமக்குப் பெருமான் ` என்று எப்பொழுதும் துதித்துத் துதித்து , அஞ்சலி கூப்பிநின்று , கழலும் சிலம்பும் ஒலித்தலைக் கொண்ட உனது செவ்விய திருவடியிடத்துக் கொண்ட அன்போடும் வந்து அடைந்தேன் ; என்னை ஏற்றுக் கொண்டருள் .

` காரணம் ` என்றது , திருவருளை . அடுக்குக்கள் , பன்மை குறித்தன . ` நின்று ` என்றதனை , ` அஞ்சலி செய்து ` என்றதன் பின் கூட்டுக . ` கழலும் சிலம்பும் ` என்பது , ஆற்றலான் வந்தது . ` எங்கள் முதற்கடவுள் ` என்றது , உன்னை முதற்கடவுளாக அறிதல் அனை வர்க்கும் ஆவதன்று என்றபடி . இது , மார்க்கண்டேயருக்குச் செய்த திருவருளை எடுத்தோதி யருளியது .

திருவாவடுதுறையில் எழுந்தருளியுள்ள , எங்கள் முதற்கடவுளே , தெளிவுபெற்ற சிலந்தி ஒன்று , தனது வாயினின்றும் உண்டாகும் நூலால் அழகிய பந்தரை உறுதிப்பட ஆக்க , அச் சிலந்தியை , சுருண்ட , சிவந்த சடையை உடையையாகிய நீ சோழ னாய்ப் பிறக்கச்செய்த திருவருளை அறிந்து , அடியேன் , எனது எதிர் வினைக்கு அஞ்சித் துணுக்குற்று , உனது அழகிய மலர்போலும் திரு வடியில் விழுந்து புரண்டு , ` போற்றி ! போற்றி !` என்று துதித்து , அன்பினால் அழுது , உன்னை வந்து அடைந்தேன் ; என்னை ஏன்று கொண்டருள் .

சிலந்தியது தெருட்சி , அதனது வாய்க்கு ஆக்கப் பட்டது . சோழன் , கோச்செங்கட் சோழ நாயனார் ; இவரது வரலாற்றை , பெரிய புராணத்துள் விளங்க உணர்க . தொடர்ச்சி - தொடர்பு ; அஃது அருளாகிய தொடர்பைக் குறித்தது . ` அரண்டு ` என்பது , ` துணுக்குற்று ` எனப் பொருள் தருவதொரு சொல் . எதிர்வினை , இனிச் செய்யும் வினை ; இஃது ` ஆகாமியம் ` எனப்படும் ; இது , பழவினையாகிய சஞ்சிதம் தொலையப் பெற்றாரையும் வந்து பற்றும் வன்மையுடைய தாகலின் , அதற்கு அஞ்சிய அச்சத்தினையும் , அதுபற்றி இரந்துநின்ற நிலையையும் இத்துணை வகுத்து அருளினார் . இது , சிலந்திக்குச் செய்த திருவருளை எடுத்தோதியருளியது .

தேவர்கட்குத் தேவனே , திருவாவடுதுறையில் எழுந்தருளியுள்ள , எங்கள் முதற்கடவுளே , மிக்க புகழுடையவனாகிய திருமால் நாள்தோறும் ஆயிரந் தாமரைப் பூக்களால் உன்னை அருச்சிக் கின்றவன் , ஒருநாள் ஒரு சிறந்தபூக்குறைய , அவன் அதற்கு மெலி யாது , புகழத்தக்க உறுதிப் பாட்டுடன் , தனது கண்களில் ஒன்றைப் பெயர்த்து உனக்குச் சாத்த , அதனைக்கண்டு மகிழ்ந்து அவனுக்கு நீ சிறந்த சக்கரப்படையை அளித்தமையை உணர்ந்து , அடியேன் , என் நிலைமையைப் பெயர்த்து , நிலையில்லாது உழலச் செய்கின்ற வலிய வினைக்கு அஞ்சி , ஒளிவீசுகின்ற உனது திருவடிகளைத் துதித்து , உனது பெருமைகள் பலவற்றையும் பலகாற் பேசி , உன்னை வந்து அடைந்தேன் ; என்னை ஏன்றுகொண்டருள் .

திருமால் இவ்வாறு சிவபிரானை வழிபட்டு , அப் பெருமான் சலந்தராசுரனை அழித்தற் பொருட்டுத் தோற்றுவித்த சக்கரப் படையைப் பெற்றமையை , ` சலமுடைய சலந்தரன்றன் உடல்தடிந்த நல்லாழி நலமுடைய நாரணற்கன் றருளியவா றென்னேடி நலமுடைய நாரணன்றன் நயனமிடந் தரனடிக்கீழ் அலராக இடஆழி அருளினன்காண் சாழலோ ` ( தி .8 திருவா . திருச்சாழல் -18.) ` பங்கயம் ஆயிரம் பூவினில்ஓர் பூக்குறையத் தன்கண் இடந்தரன் சேவடிமேற் சாத்தலுமே சங்கரன் எம்பிரான் சக்கரம்மாற் கருளியவா றெங்கும் பரவிநாம் தோணோக்கம் ஆடாமோ ` ( தி .8 திருவா . திருத்தோ -10.) என்னும் திருவாசகத் திருப்பாடல்களால் அறிக . ` நாண் மலர் ` எனப் பாடம் ஓதுதல் சிறக்கும் , பித்தர்போலப் பலகாற் கூறுதலை , ` பிதற்றி ` என்று அருளினார் . இது , திருமாலுக்குச் செய்த திருவருளை எடுத்தோதி யருளியது .

திருவாவடுதுறையில் எழுந்தருளியுள்ள , எங்கள் முதற்கடவுளே , நீ , ஒரு வேடுவனாய் உருக்கொண்டு , ஒரு பன்றியை , வீரத்துடன் விரைந்து துரத்திச் சென்று , உன்னை நோக்கித் தவம் செய்துகொண்டிருந்த அருச்சுனனை அடைந்து , அவன்மேல் வைத்த விருப்பத்தால் அவனோடு போர் புரிந்து , பின்பு அவனுக்கு , சிறந்த படையாகிய பாசுபதக் கணையை அளித்தமையை அறிந்து , அடியேன் உனது தன்மைகளை நினைந்து உருகி , உனது திருப்பெயர்களை அன் போடு சொல்லி உன்னை வழிபட்டு , ஆர்வத்தோடு வந்து உன் திருவடி யிணையை அடைந்தேன் ; என்னை ஏன்று கொண்டருள் .

` விசைந்து ` என்பது பாடம் அன்று . ` அன்பாய்ப் போரைப் புரிந்து விசயனுக்குப் படை கொடுத்தல் ` என இயையும் , இவ்வாறு அருச்சுனனுக்கு அருளிய வரலாற்றை , பாரதத்துட் காண்க . இஃது , அருச்சுனனுக்குச் செய்த திருவருளை எடுத்தோதி யருளியது .

வேதம் ஓதுபவனே . உலகிற்கு முதலாய மூர்த்தியே , உன் அரையில் எலும்பை அணிந்த பெருமானே , திருவாவடுதுறையில் எழுந்தருளியுள்ள , எங்கள் முதற்கடவுளே , நீ , மூன்று ஊர்களில் ஓங்கி எரிகின்ற நெருப்பை ஒருசேர எழுப்பியபொழுது , அங்கு உன்னையே நினைத்திருந்த மூவராகிய அவர் மட்டில் உய்ந்து , உன் திருவடியை அடைந்து , மேல்உலகத்தை ஆளும் வண்ணம் , அவர்கட்கு , புகழத்தக்க வகையில் திருவருள் ஈந்தமையை அறிந்து , அடியேன் , மேலான உனது திருவடியையே தொழுது முறையிட்டு , உன்னை அடைந்தேன் ; என்னை ஏன்றுகொண்டருள் .

` முப்புரத்திலும் ஒக்க எரி தூவ ` என்க . எரியை உண்டாக்கினமையை , தூவியவாறாக அருளினார் . திரிபுரம் எரித்த காலத்தில் , சிவபத்தியிற் பிறழாதிருந்த மூவரைச் சிவபிரான் உய்யக் கொண்டமையை மேலே உரைத்தாம் ( தி .7 பா .55 பா . 8); கண்டு கொள்க . இது , முப்புரம் எரித்தஞான்று மூவர்க்குச் செய்த திருவருளை எடுத்தோதியருளியது . இத் திருப்பதிகத்துள்ளும் , ஏனைய திருப்பாடல்களை நாம் பெறேமாயினேம் . * * * * * * 6, 7, 8, 9, 10 6, 7, 8, 9, 10. * * * * *