கங்கையைத் தாங்கிய நீண்ட சடையை உடையவனே , பூத கணங்கட்குத் தலைவனே , காலனுக்குக் காலனே , காமன் உடலுக்கு நெருப்பாகியவனே , அலை மிகுகின்ற பெரிய கடலில் தோன்றிய நஞ்சினை உடைய கண்டத்தை உடையவனே , உயிர்கட்கு முதல்வனே , அறவடிவினனே , தூயோனே , சிவந்த கண்களை யுடைய திருமாலாகிய இடபத்தை யுடையவனே , தெளிந்த தேன் போல்பவனே , கடவுளே , தேவர்களாகிய விலங்குகட்கு ஆண் சிங்கமாய் உள்ளவனே , திருவாவடுதுறையில் எழுந்தருளியிருக்கின்ற கருணையாளனே , அடியேனுக்கு உறவாவார் , உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி எனக்கு அருள் செய்யாய் .

` அமரர்கட்குத் தலைவனே ` என , வாளா அருளாது , ` அமரர்கள் ஏறே ` என , உருவகித்து அருளினார் , அவனது முதன்மை யின் சிறப்புத் தோன்றுதற்கு . அமரர்கள் ஏறு , ஏகதேச உருவகம் . இது , வலிமை நிலனாக வந்தது . ` ஏறு ` என்ற உருவகம் , ஏனைய பெயர் களோடு இயைந்தது . திணைவழுவமைதி .

நிலவுலகின்கண் மானுட வாழ்க்கையில் மயங்கிக் கிடக்கக் கடவேனாகிய என்முன் நீயே வலிய வந்து என்னை ஆண்டு கொண்டவனே , தெளிவாகிய நிலவொளியை வீசுகின்ற சடையை உடையவனே , இறைவனே , திருவாவடுதுறையில் எழுந்தருளியிருக் கின்ற அண்ணலே , தேவர்களாகிய , விலங்குகட்கு ஆண் சிங்கமாய் உள்ளவனே , யான் கண் இல்லேனாயினேன் ; அதன்மேலும் , உடம்பில் வந்து பற்றி வருத்துகின்ற நோயினால் மனம் வருந்தினமையால் , உனக்குத்தான் சுமையாய் விட்டேன் ; எனக்கு உறவாவார் உன்னை யன்றி வேறு யாவர் உளர் ! ஆதலின் , என்னை ` அஞ்சேல் ` என்று சொல்லித் தேற்றி , எனக்கு அருள்செய்யாய் .

` என்னை வலிய வந்து ` என்றதில் , என்னை , உருபு மயக்கம் . ` உடம்பில்லடு நோய் ` என்ற லகர ஒற்று , விரித்தல் . சுவாமிகள் கண்ணின்றி இருந்ததோடு , உடம்பிற் பிணியுற்று இருந் தமையையும் நினைக்க . ` கருத்தழிந் துனக்கே பொறை யானேன் ` என்றதை , ` கடை முறை உனக்கே பொறையானேன் ` ( தி .7 ப .60 பா .5) என்றதனோடு வைத்துக் காண்க .

நிகரற்ற தனங்களையுடைய உமையவளை ஒரு பாகத்தில் உடையவனே , மேலானவனே , ஊமத்தம் பூப் பொருந்திய சடையை உடையவனே , முப்புரங்களைத் தீவளையச் செய்து , அப்பொழுதே அவற்றில் இருந்தவர்களுள் மூவருக்கு மட்டில் அருள் செய்ய வல்லவனே , அறத்தைச் சொல்லுதற்கு ஆல் நிழலில் அமர்ந் தருளிய செல்வனே , திருவாவடுதுறையில் எழுந்தருளியிருக்கின்ற என் அப்பனே ! தேவர்களாகிய விலங்குகளுக்கு ஆண் சிங்கமாய் உள்ளவனே , எனக்கு உறவாவார் உன்னையன்றி வேறு யாருளர் ! என்னை ` அஞ்சேல் ` என்று சொல்லித் தேற்றி , எனக்கு அருள் செய்யாய் .

திருவாவடுதுறையில் உள்ள அம்மைக்கு , ` ஒப்பிலா முலையாள் ` என்பது பெயராய் வழங்குதல் நினைக்கத் தக்கது . ` தீ வளைத்து ` என்றதனை , ` தீயாய் வளைத்து ` என விரித்தலுமாம் .

சீற்றத்தொடு வந்த காளியினது கோபம் தணியும்படி அவளோடு எதிர்நின்று ஆடிய நடனத்தை யுடையவனே , மாணிக்கம் போல்பவனே , மணவாளக் கோலத்தினனே , தேவர்கள் , முறைப்படி வணங்கித் துதிக்கின்ற இறைவனே , திருவாவடுதுறையில் எழுந்தருளி யிருக்கின்ற தலைவனே , தேவர்களாய விலங்குகட்கு ஆண் சிங்கமாய் உள்ளவனே , அறிவில்லேனாகிய யான் உடம்பில் வந்து வருத்துகின்ற பிணியினால் , செய்வது அறியாது மனம் கலங்குகின்றேன் ! எனக்கு உறவாவார் , உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி , எனக்கு அருள் செய்யாய் .

சிவபிரான் காளியோடு நடனப் போர் செய்து , அவளது செருக்கை அடக்கிய புராண வரலாற்றினை , ` ஓடிய தார கன்ற னுடலம் பிளந்தும் ஒழியாத கோபம் ஒழிய ஆடிய மாந டத்தெ மனலாடி பாத மவையாம் நமக்கொர் சரணே ` ( தி .4 ப .14 பா .4) எனத் திருநாவுக்கரசரும் , தேன்புக்க தண்பணைசூழ் தில்லைச்சிற் றம்பலவன் தான்புக்கு நட்டம் பயிலுமது என்னேடி தான்புக்கு நட்டம் பயின்றிலனேல் தரணியெலாம் ஊன்புக்க வேற்காளிக் கூட்டாங்காண் சாழலோ ( தி .8 திருச்சாழல் - 14) என மாணிக்கவாசகரும் அருளிச்செய்தமை காண்க . விகிர்தன் - உலகியல்பின் வேறுபட்டவன் ; கடவுட் பொருள் .

உலகமாகிய வழிக்கு முதலானவனே , வெந்த தனால் ஆகிய வெள்ளிய திருநீற்றைப் பூச வல்லவனே , அருச்சுன னுக்கு வேட உருவத்தில் சென்று அருள்செய்த சந்திர சேகரனே , தேவர் களுக்குப் புகழுடைய தலைவனே , திருவாவடுதுறையில் எழுந்தருளி யிருக்கின்ற அந்தணனே , தேவர்களாகிய விலங்குகட்கு ஆண் சிங்கமாய் உள்ளவனே , எனக்கு உறவாவார் , உன்னையன்றி வேறு யாவர் உளர் ! அன்று நீ இருக்கும் இடத்தில் செருக்குக் கொண்டு வந்த கொடிய அரக்கனாகிய இராவணனது வலிமையை அழித்து , பின்பு அவனுக்கு வாழ்நாள் கொடுத்து விடுத்தாய் ; இன்று , என்னை , ` அஞ்சேல் ` என்று சொல்லித் தேற்றி , எனக்கு அருள் செய்யாய் .

` இராவணனை முன்பு ஒறுத்ததோடு ஒழியாது , பின்பு , அவனுக்கு அருள்பண்ணியது போல , இன்று அடியேனை ஒறுத் தொழியாது , அருள்பண்ணுதல் வேண்டும் ` என்றபடி . ` அந்தணா ` என்றதும் , ` அழகிய தட்பத்தையுடையவனே ` என , அவனது அருளுடைமையைக் குறித்தவாறாம் .

` குறை ` எனப்படுவது ஒன்றேனும் இல்லாத நிறைவுடையவனே , இறைமைக் குணங்கள் எல்லாவற்றானும் இயன்ற தொரு மலை எனத் தக்கவனே , கூத்துடையவனே , குழையணிந்த காதினை யுடையவனே , சிறையை யுடைய வண்டுகள் ஒலிக்கின்ற சோலை சூழ்ந்த திருவாரூரில் உள்ள , செம்பொன் போல்பவனே , திருவாவடுதுறையில் எழுந்தருளியிருக்கின்ற அறவடிவினனே , தேவர்களாகிய விலங்குகட்கு ஆண் சிங்கமாய் உள்ளவனே , அடியேனும் உன்னையன்றி உறவினர் ஒருவரையும் உடையேன் அல்லேன் ; எனக்கு உறவாரும் உன்னையன்றி வேறு யாவர் உளர் ! ஆதலின் , யான் செய்த ஒரு குற்றத்தை நீ பொறுத்துக்கொண்டால் , உனக்கு வருவதொரு தாழ்வுண்டோ ! என்னை , ` அஞ்சேல் ` என்று சொல்லித் தேற்றி , எனக்கு அருள்செய்யாய் .

எல்லாவற்றினும் மேலான பொருளாகிய இறைவன் ஒருவனையன்றி , குறை சிறிதும் இல்லாத நிறைவுடைய பொருள் வேறொன்றில்லாமையை வலியுறுத்துணர்த்துவார் , ` குறைவிலா நிறைவே ` என , எதிர்மறையானும் , உடம்பாட்டானும் அருளிச் செய்தார் . ` குறைவிலா நிறைவே குணக்குன்றே ` என்ற இதனை , ` குறைவிலா நிறைவே கோதிலா அமுதே ஈறிலாக் கொழுஞ்சுடர்க் குன்றே ` ( தி .8 கோயில் திருப் .5) என்ற திருவாசகத்தோடும் வைத்துக் காண்க . தமக்குத் துணைசெய்ய வல்லார் பிறரின்மையை வலியுறுத்து வேண்டுவார் , ` உறவிலேன் ` எனத் தம்மேலும் , ` உறவு யார் ` எனப் பிறர் மேலும் வைத்து , இருவாற்றானும் அருளிச்செய்தார் . ` ஒரு பிழை ` என்றது , சூள் பிழைத்தமையை . ` ஒரு பிழை பொறுத்தால் இழிவுண்டே ` என்றது , சுவாமிகளுக்கு இறைவரோடுளதாய உரிமையை இனிது புலப்படுத்து வதாகும் . திருவாரூரை அடையும் ஆர்வத்தினாலே இந்நிலை வந்தது என்பதனை நினைகின்றாராதலின் , ` திருவாரூர்ச் செம்பொனே ` என்று அருளினார் . இத்தலத்தில் இறைவர்க்கு , ` செம்பொற்றியாகர் ` என்னும் பெயர் வழங்குதல் இதுபற்றியே போலும் !

கொடிய , பெரிய யானையினது உரித்த தோலை யுடையவனே , புலித்தோல் ஆடையை உடுத்தவனே , விதிவிலக்குக் களுக்குத் தலைவனே , மெய்ப்பொருளானவனே , அன்று திருமால் வேண்டிக்கொள்ள , வலிமையையுடைய சக்கரத்தை அவனுக்கு அளித்தருளிய இறைவனே , சிவந்த திருமேனியையுடையவனே , ஒளிகள் எல்லாவற்றினும் மேம்பட்டு விளங்குகின்ற ஒளியாய் உள்ளவனே , நெருப்புக்கண்ணை உடையவனே , திருவாவடுதுறை யில் எழுந்தருளியிருக்கின்ற தலைவனே , தேவர்களாகிய விலங்கு கட்கு ஆண் சிங்கமாய் உள்ளவனே , எனக்கு உறவாவர் உன்னை யன்றி வேறுயாவர் உளர் ! என்னை , ` அஞ்சேல் ` என்று சொல்லித் தேற்றி , எனக்கு அருள் செய்யாய் .

` வேங்கை ` என்றது , ஆகுபெயர் . ` விதி ` என்றது , ` ஆணை ` என்னும் பொருளதாய் , விதிவிலக்குகளைக் குறித்தது . ` விதி விலக்குகட்கு முதல்வனானவனே ` என்றதனால் , ` எனது பிழையைப் பொறுப்பினும் , பொறாது ஒறுப்பினும் உன்னையன்றி முதல்வர் வேறு யாருளர் ` என்றவாறாயிற்று . திருமாலுக்குச் சக்கரத்தை அருளினமை யும் , ` வேண்டுவார் வேண்டுவதனை ஈகின்றவன் ` என்பதனைக் குறித்த படியாம் . ` செங்கண் ` என்றது , குறிப்பினால் , ` நெருப்புக் கண் ` என்னும் பொருளைத் தந்தது .

கோதில்லாத அமுதம் போல்பவனே , அருள் வெள்ளம் பெருகுகின்ற தோற்றத்தை உடையவனே , தேவர்கள் வணங்குகின்ற தலைவனே , உடம்பின் ஒருபாதியில் மங்கை ஒருத்தியது ஒருபங்கினை உடையவனே , உயிர்கட்குத் தலைவனே , மேலானவனே , மேலிடத்தில் இருப்பவனே , நன்மையால் இயன்ற மலைபோல்பவனே , சிறப்புடைய அருள் பொருந்திய வீரனே , திருவாவடுதுறையில் எழுந்தருளியிருக்கின்ற முதற்பொருளான வனே , தேவர்களாகிய விலங்குகட்கு ஆண் சிங்கமாய் உள்ளவனே , எனக்கு உறவாவார் , உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி , எனக்கு அருள்செய்யாய் .

` கோதிலா அமுதே ` என்ற இதனையும் , மேற்காட்டிய ( தி .8 கோயில் திருப் .) திருவாசகத்திற் காண்க . கோது - சுவையற்றதாய்க் கழிக்கப்படும் பொருள் . ` கோதிலா அமுது ` என்றதனை , ` காழில் கனி ` ( குறள் - 1191) என்றதுபோலக் கொள்க . ` பெருகு ` என்றது , குறிப்புருவகம் . இறைவனது வேடங்கள் அவனது பேரருளைப் பொழிவனவாகலின் , ` அருள்பெருகு கோலமே ` என அருளினார் . ` கோலம் ` ஆகுபெயர் . தீதில்லாமை , அருத்தாபத்தியால் நன்மையைக் குறித்தது . முப்புரம் எரித்தமை முதலிய அனைத்தும் , அருள்காரணமாகவே நிகழ்ந்தன என்றற்கு , ` திருவருள் சேர் சேவகா ` என அருளிச்செய்தார் .

ஆகாயமாகிய நாட்டை உடையவனே , செல்லும் வழிக்குத் துணையாகிய அமுதம்போல்பவனே , குற்றமில்லாத மாணிக்கம் போல்பவனே , வேதத்தின் பொருளாய் உள்ளவனே , பன்றியின் பெரிய கொம்பினையும் , ஆமை ஓட்டையும் , எலும்பையும் , இடப்பட்ட அணிகளாகத் தாங்கிய மார்பையுடையவனே , ` தேன் , நெய் , பால் , தயிர் ` இவைகளால் மூழ்குவித்தலை விரும்புகின்றவனே , இறைவனே , திருவாவடுதுறையில் எழுந்தருளியிருக்கின்ற என் யானை போல்பவனே , தேவர்களாகிய விலங்குகட்கு ஆண் சிங்கமாய் உள்ளவனே , எனக்கு உறவாவார் உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி எனக்கு அருள் செய்யாய் .

இத்தலத்தில் இறைவனுக்கு , ` மாசிலாமணியீசன் ` எனப் பெயர்வழங்குதல் இங்கு நினைக்கத் தக்கது . ` எயிறு ` என்ற இடத்தும் , எண்ணும்மை விரிக்க . ` ஆமை ` ஆகுபெயர் . ` ஈடு ` என்ற முதனிலை திரிந்த தொழிற்பெயர் ஆகுபெயராய் , இடப்பட்ட அணிகலங்களைக் குறித்தது . ` ஈடாக ` என ஆக்கச்சொல் வருவிக்க . ஆனைந்தில் , நெய் முதலிய சிறப்புடைய மூன்றனையும் எடுத் தோதவே , ஏனைய இரண்டும் உடன்கொள்ளப்படும் . ` ஆனை ` என்றது , வலியும் , காதலும் நிலைக்களனாக வந்த உருவகம் .

வெண்டலையோடு பொருந்தும் பிறையையும் , கொன்றைமலர் மாலையையும் , பாம்பினையும் , தேனையுடைய ஊமத்த மலரையும் ஒருங்கு விரவிச் சூடிக்கொண்ட சிறந்த இண்டை மாலையையுடைய , சிவந்த சடைமுடியையுடையவனும் , முதற் கடவுளும் , திருவாவடுதுறையில் எழுந்தருளியிருக்கின்ற சிவலோக வாணனும் ஆகிய இறைவனை , அவனுக்கு அணுக்கனாய் நிற்கின்ற வன்றொண்டனாகிய , சிங்கடிக்குத் தந்தை , மிக்க அன்போடும் பாடிய இத்தண்ணிய தமிழ்மாலைகளாகிய பாடல்கள் பத்தினையும் பாட வல்லவர்கள் , இறத்தலையும் பிறத்தலையும் ஒழித்து , எஞ்ஞான்றும் ஒரு தன்மையராய் வாழ்வார்கள் .

வெண்டலை, தாருகாவனத்து முனிவர்கள் விடுத்தது; அதனைச் சிவபெருமான் தன் தலையில் அணிந்து கொண்டமை அறிக. `அறுப்பார்` என்றது, அதன் காரியத்தையும் தோற்றுவித்து நின்றது. எஞ்ஞான்றும் ஒரு தன்மையராய் வாழ்தல், இறைவன் திருவடி இன்பத்தில் திளைத்திருத்தலாம்.