அநுபோக இலக்கணம்
இதுபற்றிய குறிப்புக்கள் முன்னைத் திருப்பதிகத்தின் முகத்தே கொடுக்கப்பட்டன. இதன்கண், அடிகளது அநுபவம் இனிது விளங்கி நிற்றல்பற்றி, இதற்கு `அநுபோக இலக்கணம்` எனக் குறிப்புரைத்தனர் முன்னோர். இது `தில்லையில் அருளிச்செய்யப் பட்டது` என்பதே பதிப்புக்களில் காணப்படுவது. இது, முழுவதும் எழுசீரடி விருத்தத்தால் ஆயது, இது, கோயில் திருப்பதிகமாகவும், இதனுள் எல்லாத் திருப்பாட்டுக்களிலும், ``திருப்பெருந்துறையுறை சிவனே`` என்றே அடிகள் அழைத்தருளிச்செய்தல் கருதத்தக்கது. `கோயில் என்பது திருப்பெருந்துறையே` எனச் சாதிப்பாரும் உளர்.
